Wann een Iech d’Fro stellt: Wie war den éischte Mënsch um Sommet vum Mount Everest, op deem mat 8.848 Meter héchste Bierg vun der Welt.
Dann ass et bal sécher, datt den Numm vum neuseelänneschen Alpinist Edmund Hillary genannt gëtt.
An Asie kéint do awer d’Äntwert anescht sinn, oder op d’mannst géif nach e weideren Numm genannt ginn, an zwar dee vum Sherpa Tenzing Norgay, dee mam Hillary uewen um Everest-Sommet stoung. Am Mee 1953 hunn den Neuseelänner Edmund Hillary a säi Sherpa, den Tenzing Norgay, den Exploit realiséiert, en Exploit deen an d’Mënschheetsgeschicht agaangen ass.
Den Hillary an den Tenzing Norgay stoungen den 29. Mee 1953 um hallwer 12 moies als éischt Mënschen um héchste Bierg vun der Welt, dem Mount Everest.
Den Tenzing Norgay ass deemools als einfache Mann op de Everest geklommen, a fir d’Vollek vun de Sherpaen als Held nees erofkomm.
De Jean Claude Majerus erënnert un de Tenzing Norgay, deen, wéi hie selwer gemengt huet, den 29. Mee 1914, virun 110 Joer op d’Welt koum.
D‘Erënnerung un den Tenzing Norgay soll och en Hommage un dat ganzt Vollek vun de Sherpae sinn, ouni si hätte wuel ni esou vill Leit um Sommet vun engem 8.000er gestanen.