Den Numm Fernand Weides dierft sécher deenen 100,7-Nolauschterer, déi scho laang de Radio suivéieren, e Begrëff sinn. De Fernand Weides war nämlech vu Juli 1994 bis August 2013, also bal 20 Joer laang, Direkter vum 100,7, éier hien an d’Pensioun gaangen ass. No sengem Journalismusstudium huet seng berufflech Karriär 1974 beim Republicain Lorrain ugefaangen, du koum hie bei d‘Tageblatt, voll an der Zäit vun der Stolkris, mat spéider och enger Nominatioun als Chefredakter adjoint.
Eng aner grouss Passioun vum Fernand Weides sinn déi nei Informatiounstechnologien, mat notamment senger Aktivitéit bei der Societéit Videocom, hie war Direkter vun Eldoradio an du vun 1994 un Direkter vum radio 100,7. Do huet hien nieft senger administrativer Aarbecht awer och weider “um Terrain” geschafft, erënnere mir un de Rendez-vous an der Galerie, dem Rendez-vous mat der Konscht all Méindeg Owend um 100,7, wat eng weider Passioun vum Fernand Weides ass, nämlech d’Konscht.
Dernieft goung dem Fernand Weides säin Engagement nach méi wäit, an zwar als aktive Member an och President vun der Association luxembourgeoise des Journalistes, oder senger Aarbecht am Conseil de Presse, och do zäitweis als President.
