De Jean Claude Majerus erënnert un ee vun dee ganz beléifte Lëtzebuerger Volleksschauspiller, deen op Allerhellegen 2004 am Alter vu nëmme 75 Joer gestuerwen ass: den Aly Bintz.
Den Aly Bintz war de 31 Mäerz 2001 hei beim radio 100,7 an der Emissioun “Zäitzeien” op Besuch. Mir proposéieren Iech dat Gespréich vun deemools nach emol, als Hommage un de Schauspiller a Sänger.
Den Aly Bintz huet wuel alles, wat et vu Lëtzebuerger Operett gëtt, gesongen. Vun him ginn eng ganz Partie Diske mat populärer Lëtzebuerger Musek, hie war och op der Bün a villen aneren Domainer doheem a wosst a sou munchen Theaterstécker ze iwwerzeegen.
An dernieft hunn den Aly Bintz a seng Fra Micky Erpelding, déi am Juli 2000 gestuerwen ass, zesummen als Artistekoppel fir eng Abberzuel lëschteger Stonne gesuergt.
Als Famill stoung hien och zesumme mat senger Fra a mat senge Kanner Simone a Brigitte Bintz op der Bün. An hien ass de Papp vum Geschäftsmann an excellente Gittarist Jean Claude Bintz.
Den Aly war u sech ni doheem, soit mam Micky op der Bün, soit eleng, mee Bintze waren, sinn a bleiwen eng Kënschtlerfamill, dat war net nëmme bei den Elteren esou, mee gelt och fir d’Kanner an d’Kandskanner.
