D'Léa Linster ass an der Gastronomie grouss ginn. An engem Café, Restaurant, Hotel mat enger Keelebunn an enger Bensinnsstatioun, ëmgi vu Mënschen an an der Haaptsaach vun hirer Famill. No hirer Première ass si Droit studéiere gaangen, mee 1982 ass hire Papp gestuerwen. Een déiwen Aschnëtt an hirem Liewen, deen eppes Neies wuesse gedoen huet. Si koum nees zeréck op Lëtzebuerg an huet sech ëm de Familljebetrib gekëmmert.
Eng Obligatioun, déi zu enger Passioun gewuess ass an deen éischte Fonke war fir eng Karriär an der Gastronomie unzegoen. 1987 krut si hiren éischte Guide Michelin Stär, zwee Joer duerno huet si, als bis ewell eenzeg Fra, de prestigiéisen Bocuse d'Or gewonnen. Mat vill Determinatioun an haarder Aarbecht huet si sech de Wee zu de Stären opgemaach. Donieft hunn hir Waarmhäerzegegkeet an hire Virwëtz, gekoppelt mat engem grousse Laachen an enger awer heiansdo spatzer Zong hir erlaabt, déi ganz Grouss aus der Gastronomie ze begéinen: Frédy Girardet, Joël Robuchon, Paul Bocuse, d'Famill Troisgros, elauter Mënschen, déi hir Kiche méi räich gemaach an hir Léift fir d'Kache verstäerkt hunn.
Dacks gesäit een d'Stärekächin op der däitscher Tëlee, si schreift fir verschidden Zeitungen an dierf sech och an de Kach-Jurye Plaz huelen. D'Léa Linster ass eng Fra, déi sech an engem Männerdomaine duerchsetze konnt, konstant op héijem Niveau kacht a schafft.
2021 gouf si zu Berlin fir hiert Liewenswierk ausgezeechent, vum Genoss Festival Eat!Berlin, dee säi Choix esou begrënnt huet, datt d'Léa Linster e Virbild fir jonk Fraen am Beruff ass.
