De John Rech kuckt op eng laang musikalesch Karriär zeréck. Als Sänger a Gittarist vun der Pop-Rock-Grupp T42, déi hiren éischten Album 1992 erausbruecht hunn, ass Villes lassgaangen. Nodeems d'Grupp néng aner, dorënner dräi Live-Albumen an zwou Kompilatiounen erausbruecht huet, huet T42 sech 2005 opgeléist.
Parallel dozou huet de John Rech vun engem weidere Projet gedreemt, a 1997 ass säi Solo Projet "Dream Catcher" Realitéit ginn. Mat senge Kolleege Christof Brill, Wolfgang Wehner, Eric Falchero, Claude Zeimes a Steve Krippler huet "Dream Catcher" Folk Pop mat kelteschem Sound, dee gutt Laun verstreet, gespillt. No villen Optrëtter, e puer Singelen an EPe koum 2006 den Debutalbum eraus. Iwwer deene fënnef Albumen huet d'Band hire Stil fonnt, andeems se Elementer vu Folkmusek a Rock vermëschen. Donieft huet de John Rech mat senger Firma "Kitty Music" Concerten organiséiert.
Eigentlech wollt hie Fierschter ginn, huet bei der LSAP geschafft, mee d'Musek huet a sengem Liewen d'Iwwerhand kritt. Ob op der Bün oder hanner de Kulissen, de Joh Rech versteet de Business a weess, datt et net ouni Disziplin méiglech ass ze performéieren.
Zu Diddeleng gebuer, an do ass hien och bliwwen, wou hie scho fréi seng Empreinte gelooss huet, andeems hien d'Festivalslandschaft matgeformt huet. 1994 gouf déi éischt Fête de la Musique ënner dem John Rech sengem Impuls organiséiert. D'Editioun 2022 ass den 18. an 19. Juni. Donieft sinn "Usin" an den "Zeltik", deen dëst Joer 25 Joer feiert.
Iwwer seng Renconter mam Andy Genen ass eng grouss Frëndschaft entstanen an esou hunn de Museker an den Illustrateur decidéiert zesummenzeschaffen a "Sonic Comics" erausbruecht - Musek vun "Dream Catcher", mat um Album enger BD, déi eng Geschicht erzielt, vum Andy Genen illustréiert. 2015 hunn déi zwee de Buchpräis kritt fir den drëtten Album vun der Serie "Dream Catcher".
2020 koum am Kader vum 25. Anniversaire vun der Aschreiwung vun den ale Quartieren a Festunge vun der Stad Lëtzebuerg op d'UNESCO-Lëscht vum Weltkulturierwen, e Comic eraus, "Fortific(a)tions", vun de Comic Befestegunge publizéiert, an deem am Ganze sechs Comic-Kënschtler an dräi Zenario-Auteuren involvéiert waren.
Um Album si fënnef Episoden iwwer d'Festungsstad, déi an enger Kadergeschicht agebonnen, inspiréiert vum Joseph Funck sengem Roman "Kleines Schiksal". Den John Rech an d'Sabrina Kaufmann huelen d'Konscht-Kollektioun vum Groussherzogleche Palais als Ausgangspunkt fir d'Geschicht vun der Festungsstad ze erzielen.
