D'Karma Catena gehéiert zur sougenannter Generatioun Z an hëlt hir musikalesch Inspiratioun aus der Realitéit, aus dem alldeegleche Liewen. Donieft dréckt si sech iwwer hire Blog reegelméisseg aus zu diverse Sujeten.
Hanner hirem musikalesche Projet stécht eng Zort Dokumentatioun vun hirer perséinlecher Evolutioun als Artistin, mee awer och als Persoun.
Si ass zu Lëtzebuerg gebuer, huet portugisesch Wuerzelen. Hir Grousseltere sinn deemools vun enger autoritärer Diktatur fortgelaf, ënner dem Regimm vum António de Oliveira Salazar voller Ongewëssheet wat hiert neit Liewen hinne bidde géif. Iwwerdeems si hu misste Sacrificë maachen. Dat war Enn de 1960er Joren. D'Geschicht vun hire Wuerzelen huet si an engem Song thematiséiert: "Industrial Salt".
Nieft Migratioun interesséieren aner Theemen déi jonk Artistin, déi alleguerten hir Texter selwer schreift, och Diskriminatioun, Klimaschutz a Wandel, europäesch Wäerter a si ass iwwerzeegte Feministin. Deemno beschäftegt d'Roll vun der Fra an der Museksbranche si och besonnesch. Als Aktivistin geet si op Demoen.
Loscht Saachen ze beweegen
Hir neiste Single, Bubblegum, ass ee Song iwwer Frëndschaft, méi genee iwwer dem Karma Catena säi Lien zum Ada, senger beschter Frëndin.
C'est Karma huet Loscht Saachen ze soen an ze beweegen, si mécht et iwwer hir Stëmm a Fieder. Déi 20 Joer al Sängerin ass eng engagéiert Feministin an huet op hirem Blog fir de Weltfraendag d'Fro gestalt, wat et bedeit an dëse Krisenzäiten - bedéngt duerch Krich an d'Klima Kris, Fra ze sinn.
"Farbfilm" als "Amuse Bouche"
C'est Karma huet elo, ee Joer nom Release vun der leschter EP "Farbfilm", eng nei Single erausbruecht, "Bubblegum".
Do séngt d'Kënschtlerin vun enger ganz gudder Frëndschaft. D'Sängerin seet, datt dës Frëndschaft immens stabil a gutt bliwwen ass, obwuel ee sech duerch d'Joren op perséinlech Saache fokusséiert huet a souguer a verschiddene Länner gewunnt huet. Trotzdeem géif ee sech nach dacks am Joer erëm gesinn an et wier allkéiers, wéi wa keng Zäit dertëschent vergaange wier.
Mat dëser Single kënnegt d'Musekerin dann och hir nächst EP "Amuse Bouche" un, déi am Mee 2022 soll erauskommen. Eng, wéi si seet, eklektesch awer poppeg EP.
All Song geet iwwer eng Metapher vun Iessen a Gedrénks. Nieft dem Sujet Iessen, beschäftegt C'est Karma sech mam Theema Erwuesse ginn.
