Invité beim Jean Claude Majerus ass de fräischaffenden Artist Gilles Pegel. Hien huet op der École de Recherche graphique zu Bréissel studéiert an dono eng Zäit am Mudam an der Kommunikatioun geschafft. Dunn huet de Gilles Pegel awer d'Decisioun geholl sech komplett op d'Konscht ze konzentréieren. Säin Atelier huet en am Creative Hub 1535 zu Déifferdeng.
Sech selbststänneg ze maache war fir de Gilles Pegel de richtege Schrëtt, fir seng Kreativitéit ze developpéieren. Et fuerdert vill Disziplin, déi den Artist net ëmmer huet, mee et géif een erawuessen, seet de Kënschtler.
De Gilles Pegel ass ëmmer op der Sich no eppes Neies ass. An dat kënnt och sécher doduerch, datt e séier gelangweilt ass, an et him u Gedold feelt, dofir och ëmmer d'Sich no Neiem. Et kann ee awer d'Fro stellen, ob de Gilles Pegel dann och nach Zäit fënnt fir Näischt ze maachen.
"Ech maache ganz vill Näischt, mee da freet een awer, ob dat Näischt maachen Näischt ass, et verdaut een iergendwéi ëmmer Gedanken. Ech sinn och eng Katastroph, datt ech ëmmer un zwanzeg Chantiere beienee schaffen, dat heescht ech hunn iwwerall nach Tiräng, wou nach Aarbecht op mech waart. (...) An déi Zäit, wou ech Näischt maachen, oder wou déi Saachen do leien ze gären, oder méi zeideg ze ginn, déi huet déi Aarbecht deen Ament och gebraucht."
