Bei dësem Concert, deen den 29. November 2024 am Gewandhaus zu Leipzig opgeholl ginn ass, stoung nieft bekannten Nimm och dee vun enger polnescher Komponistin am Programmheft.
Den Ufank huet awer den norwegesche Pianist Leif Ove Andsnes mam Beethoven sengem 5. a leschte Piano Concerto gemaach. Vun dësem heroeschen a politesch motivéierte Stéck ass et do eriwwer gaange bei déi 4. Sinfonie vun der polnescher Komponistin Grazyna Bacewicz. Dëst Wierk verbënnt déi sinfonesch Traditioun aus dem 19. Joerhonnert mat enger méi zäitgenëssescher Tounsprooch aus der Mëtt vum 20. Joerhonnert. De Jeremy Ney, deen duerch dëse Programm féiert, erzielt iech ënner anerem nach méi iwwert d‘Liewe vun dëser aussergewéinlecher, polnescher Komponistin.
Zum Schluss hunn d’Museker vum Gewandhausorchester Leipzig zesumme mam finneschen Dirigent Sakari Oramo nach méi impressionistesch Téin zum Beschte ginn. Hei waren et dem Claude Debussy seng „3 Nocturnes“, déi e kloren Iwwergang vun der Romantik eriwwer an d‘Modern markéieren.
Dëse Concert kënnt dir bis den 18. Februar 2025 zu all Moment an der Mediathéik vum Opus 100,7 nolauschteren.