Ee Kilo Kalzium an eise Schanken
D'Funktioun vum Kalzium an eisem Kierper.
Wou gëtt Kalzium am Kierper gebraucht? Wat si wichteg Kalzium-Quellen an ass Kalzium als eenzegen Närstoff wichteg, fir sech géint Osteoporos ze schützen?
Wann de Kierper iwwer eng laang Zäit net genuch Kalzium duerch d'Ernärung kritt, fänkt en un de Kalzium an d'Schanken sichen ze goen, an dat kann d'Struktur, d'Elastizitéit an d'Stabilitéit vun de Schanken ofschwächen. Wann dat geschitt, schwätzt ee vun Osteopenie oder am erweiderte Stadium vun Osteoporos. De Mangel u Kalzium kann awer och duerch verschidden aner Facteure begënschtegt gi wéi Medikamenter, Daarmerkrankungen, e Manktem u Beweegung, ze wéineg Vitaminn D oder ze vill Proteinnen an der Ernärung.
Kalzium fënnt een a relativ héije Quantitéiten a Mëllechprodukter wéi Kéis, Stoffi a Jughurt awer dat heescht net, datt wann ee keng Mëllechprodukter ësst, z. B. well een eng Allergie huet oder sech vegan ernäert, automatesch e Kalzium-Manktem huet. Och Liewensmëttel op Basis vu Soja hu vill Kalzium oder gréng Bounen, grénge Kabes, Fenchel, Brokkoli, Spinat, Rucola - gréngt Geméis oder Nëss a Sesam-Kären.
Als Preventioun géint Osteoporose ass et net nëmmen de Kalzium dee wichteg ass. Kalzium eleng bréngt et net fäerdeg d'Dicht vun de Schanke wesentlech ze verbesseren. Wichteg ass et, scho jonk op eng gesond Ernärung mat villen Närstoffer opzepassen, well an den éischten 30 Liewensjore gëtt den Haaptdeel vun eiser Mass vu Schanken opgebaut. Dofir brauch ee genuch Kalorien a genuch Proteinnen, awer net ze vill. Ideal sinn och op d'mannst 400-500 Gramm Geméis an Uebst den Dag. Dat liwwert niewent Kalzium nämlech och aner Vitaminne wéi Folsaier oder Vitaminn C, de Mineralstoff Magnesium an aner wichteg Spuerenelementer wéi Zénk a Koffer, déi all zesummen och wichteg si fir gesond Schanken.
Invitée beim Angie Maquil ass d'Dieteticienne a Mindful Eating Trainerin Céline Genson.
Buchtipp Céline Genson Bibliographie: Burgerstein. "Handbuch Nährstoffe" Trias Verlag. 2018
