An der Klimafuerschung ass de weltwäiten Austausch vun Donnéeën iwwer d’Ozeanen an iwwer d’Atmosphär essentiel. Ëm dëse Fuerschungsberäich steet et awer Ament schlecht, well de Fuerschungsservice vun der US-amerikanescher Administratioun vun den Ozeanen an der Atmosphär (NOAA) an den nächste Wochen opgeléist soll ginn. Dat schreift d’ARD Tagesschau op hirem Site. Däitsch Fuerscher sinn déi amerikanesch Donnéeën elo um retten.
US-amerikanesch Instituter froen no internationaler Hëllef
Den Zougang zu den US-amerikaneschen Dateplattforme wier suspendéiert oder géif de Risiko lafen am Mee op Äis geluecht ze ginn. D’Konsequenze wieren e grousse Mangel un Austausch vun Informatiounen, deen zu Lacunnen op de Landkaarte féiere géif. Dat kéint weltwäit Repercussiounen am Beräich vum Klimaschutz mat sech bréngen, an d’Fuerschung staark zeréck setzen.
Aus deem Grond hätten US-amerikanesch Instituter ëm international Hëllef gefrot, fir déi vulnerabel Daten ofzespäicheren. An Däitschland ass eng sougenannte „Koalition der Willigen“ entstanen, wou den AWI, den Alfred Wegener Institut zesumme mat aneren Instituter am gaangen ass déi Donnéeën ze späicheren. Mee déi Aarbecht ass kolossal, an d’Kapazitéite kéinten an Däitschland net duergoenfir dat a kuerzer Zäit kënnen ze bewältegen.
Europäescher Fuerschung feelt et un Onofhängegkeet
De renomméierten däitschen Helmholtz-Institut, deen och beim Erhale vun den amerikaneschen Donnéeë bedeelegt ass, huet iwwerdeems gemellt, datt si Schwieregkeeten hunn, fir un Informatioune vun den US-amerikaneschen Observéierungssatelliten ze kommen. Déi wiere fir d’Iwwerwaachung vun den Ozeanen an der Atmosphär vun héchster Wichtegkeet.
Experten no misst een d’Fro vun der Ofhängegkeet vun der europäescher Fuerschung vis-à-vis vun den USA reevaluéieren. Den däitsche Wëssenschaftsministére huet déi däitsch Instituter elo dorëms gebieden, déi Ofhängegkeeten ofzebauen.
