Spéitstens zanter der Krefelder Studie gouf d’Theema Insektestierwen och am Alldag aktuell. Weltwäit stierwen Insektenzorte méi séier aus, wéi neier entdeckt ginn. Och zu Lëtzebuerg ass den Zoustand kritesch, problematesch ass dobäi, datt mir iwwer vill Insekten net genuch wëssen, an et esou fir munch Aart schonn ze spéit ka sinn, fir se nach ze retten. Fir dësen Trend ophehale spillt de Monitoring eng wichteg Roll, d. h. d’Beobachtung vun den eenzelen Aarten. Dobäi läit de Fokus dacks bei de Päiperleken. Se iwwerhuelen eng wichteg Roll am Ökosystem a ginn als Schlësselaart bezeechent, a se si bei de Leit extreem beléift.
Stellvertriedend fir d'Päiperleke féiert d'Stëftung natur&ëmwelt ee Monitoring vum bloschillernde Feierfalter duerch. Duerch d’Beobachte vun dësem klengen, seelene Päiperlek kënne mir méi iwwer säi Liewensraum, de Fiichtgebidder, souwéi aner Aarte léieren. Niewent dem Monitoring ginn et awer och aner Aktivitéite fir d’Insektewelt jiddwerengem méi no ze bréngen. Jiddweree kann och eppes fir si mat einfachste Mëttel ënnerhuelen. Invité ass de Kevin Jans, Gestioun vun den Terraine bei der natur&ëmwelt ASBL.
