Salut Kanner a wëllkomm am Kannereck. De Februar ass jo dee Mount, deen net ëmmer déi selwecht Zuel Deeg huet, meeschtens huet de Februar 28 Deeg, just an engem Schaltjoer huet de Februar 29 Deeg, an dat nächst Schaltjoer ass 2024.
Mee Kanner, hutt dei da schonn eng Kéier héieren, datt de Februar och mol 30 Deeg hat. Ah dach, dat gouf et schonn, a Schweden hat de Februar am Joer 1712 30 Deeg, well si do wollte vum julianeschen op de gregorianesche Kalenner wiesselen, wat si dunn awer nees net wollten, mee fir nees ëmzestellen, huet een Dag gefeelt, an dofir hat am Joer 1712 de Februar 30 Deeg.
An der Sowjetunioun, dat wat haut Russland ass, do wollten si 1929 e Revolutiounskalenner aféieren, an deem all d'Méint am Joer 30 Deeg sollten hunn, an dofir gouf et an der Sowjetunioun 1930 an 1931 allkéiers en 30. Februar. Dat war awer 1932 schonn nees eriwwer.
Voilà Kanner, dat also zum Mount Februar, mee elo ass et awer héich Zäit bei eist Experiment ze kommen, an do hantéieren d'Michèle an de Jean Claude mat engem Whiteboard Marker. Dir kennt dat bestëmmt aus der Schoul, déi Stëfter, fir op déi wäiss Tafel ze schreiwen. D'Experiment kënnt dir och op science.lu kucken.
