Um Mëttwoch huet den Donald Trump eng Erhéijung vun den Douanestaxen op Importer annoncéiert. Generell leien d'Douanestaxe bei 10 Prozent. Fir d'EU sinn et 20 Prozent a China gëtt zousätzlech mat enger Tax vu 34 Prozent besteiert.
Den Donald Trump ass der Meenung, datt een esou déi national Wirtschaft kéint schütze viru méi bëllegen Importer. D'EU a China hate scho mat Géigemoossname gedrot.
Hien huet och decidéiert aus dem internationalen Accord iwwer d'Mindestbesteierung vu multinationale Betriber vun der OECD erauszeklammen. An Hien huet mat finanzielle Konsequenze fir déi Firmaen aus Länner gedrot, déi Steiere bei amerikaneschen Entreprisë géifen asammelen.
Franz Fayot: Minimalbesteierung ass ee Meilesteen
50 Länner hunn deen internationalen Accord ëmgesat an dee kéint och ouni d'USA weider bestoe bleiwen. Dat ass dem LSAP-Deputéierte Franz Fayot seng Aschätzung.
Den Accord iwwer d'Minimalbesteierung wier ee Meilesteen an der internationaler Fiskalitéit, erkläert hien.
Lëtzebuerger Regierung ënnerstëtzt weiderhin d'Minimalbesteierung vun den internationale Konzerner a wëllt verhënneren, datt et zu engem Nodeel fir d'EU kënnt. Grad wéi ee Konkurrenznodeel fir de Grand-Duché, ënnersträicht de Finanzminister Gilles Roth (CSV).
7.500 Entreprisen zu Lëtzebuerg vun Accord concernéiert
D'Chamber huet eestëmmeg eng Motioun ugeholl aus där ervirgeet, datt zu Lëtzebuerg 7.500 Entreprisë vun deenen internationale Minimalbesteierungsaccorde concernéiert sinn. Wéi vill dat schlussendlech fir de Staatsbudget ausmécht, wollt de Finanzminister net direkt an der Ëffentlechkeet soen.
D'Chamberkommissioun kéint déi Informatiounen a huis clos matgedeelt kréien, esou de Gilles Roth.
