No der Ukënnegung vun neien US-Douanestaxe wier et wichteg ze verhandelen, mee op enger Basis, wou vun deem selwechte geschwat gëtt, esou den Direkter vun der FEDIL René Winkin am 100,7-Interview, am Kontext vun den Zuelen, déi den US-President Donald Trump um Mëttwoch presentéiert huet.
Wichteg wier et och, datt d'Memberstaate vun der Europäescher Unioun vis-à-vis vun den USA geschlossen optrieden, esou de Vertrieder vun der multisektorieller Business-Vereenegung FEDIL, de René Winkin.
“D'EU muss als Block reagéieren. A vun dohier ass et vläicht och net falsch, wa si eis als Block consideréieren. Ob dat awer esou bleift, bleift ze gesinn. Ech menge schonn datt probéiert gëtt, déi Unitéit ze briechen, andeem vläicht dann op eenzel Memberstaate mat vläicht hire spezifesche Produkter duergaange gëtt vun der amerikanescher Säit, fir dann ze soen, voilà, mat Iech kéinte mir een Deal maachen a vläicht domat Europa opzesplécken.”
Den Challenge op der europäescher Säit léich also dobäi, déi Unitéit och iwwer d'Zäit bäizebehalen, esou den Direkter vun der FEDIL.
Negativ Handelsbilanz fir d’USA
De René Winkin huet och erkläert, datt déi ganz Handelsbilanz tëschent den USA an der Europäescher Unioun "eppes negativ" fir d’USA wier, mee net an deem Mooss, wéi et vu Washington géif duer gestallt ginn.
“Dat do ass jo eppes, wat sech iwwer Joerzéngte forméiert huet, wou Europa, Dir hutt elo vun Autoe geschwat, ebe Produktioune mécht, déi Amerikaner besser gefale wéi amerikanesch Autoen eis gefalen.”
Wat den Export vu Stolprodukter an d’USA ugeet, wieren et virun allem Spezialprodukter, déi d’USA bräichten. De René Winkin huet dorun erënnert, datt Europa kee bëllege Standuert fir d’Produktioun dovu wier.
“Trotzdeem importéiere si dat, well si déi Produkter brauchen. D'Fro, déi sech och stellt ass, ob si wierklech an deem Mooss d'Alternativen an där Qualitéit, sou wéi hir Konsumente se gären hätten, hunn. Hu se dat net? Ben, da wäerte se weider mussen déi Produkter vun eis, aus China oder vu wou och och ëmmer kafen a bezuelen dann einfach d'Taxen drop.”
Laangfristeg géifen d'USA drop setzen, datt méi Produktioun an d'USA kéim. Dat wier awer dee Punkt "wou ech awer eng Partie Fragezeiche géif maachen", huet de René Winkin betount.
Wéi eng Reaktioune vun der EU?
Wat d'Reaktioun vun europäescher Säit op déi ugekënnegt nei US-Douanestaxen ugeet, huet de FEDIL-Direkter d'EU-Kommissiounspresidentin esou verstanen, datt Verhandlunge viru Géigemoossname stéingen.
Wat esou Mesuren ugeet, kéinten d'Europäer eventuell amerikanesch Tech-Betriber an Europa spezifesch taxéieren, esou d'Analys vum Direkter vun der FEDIL René Winkin.
US-Afloss géint Diversitéitsprogrammer?
No Frankräich huet och Spuenien de probéierte Versuch vun den USA kritiséiert fir Diversitéitsprogrammer vun europäeschen Entreprisen ze stoppen. D'Regierung vum US-President Donald Trump huet Medieberichter no vun Entreprisë gefuerdert, keng Gläichstellungs- an Diversitéitspolitik ze maachen, fir datt se mat den USA kënnen zesummeschaffen. US-Ambassaden hätten d'Entreprisen an deene Länner an dësem Sënn ugeschriwwen, huet et geheescht. Dozou huet de René Winkin gesot.
“Ech hunn elo keng Kenntnis, ob déi amerikanesch Ambassade zu Lëtzebuerg Betriber ugeschriwwen huet. Ech weess awer vu Lëtzebuerger Betriber, wa se mat der US-Administratioun a Marchéen ze dinn hunn, respektiv wa se och géife Subsiden do kréien, datt dat doten ee Krittär ass.”
Déi multisektoriell Business-Vereenegung FEDIL huet 752 Memberen aus 37 Secteuren.
