Engersäits kënnen d'Polizisten déi Kamerae selwer aktivéieren. An anerersäits ginn d'Bodycammen a verschiddene Situatiounen automatesch ausgeléist.
"Wann et eng ganz geféierlech Situatioun ass, wou d'Waff gezu gëtt. Da gëtt dat automatesch ausgeléist. Duerch dee Geste, wann een d'Waff aus dem Holster zitt, da gëtt dee Moment d'Bodycam ausgeléist. Net nëmme seng, och all déi vun de Kolleege ronderëm. Dat sinn eigentlech déi extreem Situatioun.”
Duerch den Asaz vun de Bodycamme soll een "neutraalt Bild" fir d’Beweisféierung garantéiert ginn, zum Beispill am Fall vun enger Rebellioun, esou de Generaldirekter vun der Police Pascal Peters.
Op der Bilanspressekonferenz vun der Police war um Dënschdeg ugekënnegt ginn, datt vum 1. Juli u fir all Polizisten a Polizistinnen d'Bodycammen an den Asaz kommen.
An Zukunft méi Nettozouwuess bei der Police
Vun de ronn 3.200 Poliziste sinn der ronn 1.600 am direkte Kontakt mat de Leit. All Joer géife ronn 180 Poliziste vereedegt ginn. Duerch vill Pensiounsofgäng wier den Nettozouwuess relativ bescheide gewiescht. Iwwer déi nächst Jore misst den Zouwuess awer méi grouss ginn, huet de Police-Generaldirekter ugekënnegt.
“Deen Nettorenfort well eebe manner Leit a Pensioun ginn. Déi grouss Ofgäng (...) déi sinn elo esou wäit duerch. Et muss een och soen, datt relativ vill Leit sech interesséiere fir eisen Job. Fir ronn 200 Plazen hate mir iwwer 550 Kandidaten a Kandidatinnen, wat ganz gutt ass. Mee da musse mir natierlech awer och eis Critères de qualité halen.”
D’Zuel vun de Ziviliste bei der Police ass 2024 ëm 10 Prozent an d'Luucht gaangen. Et hätt ee ganz vill Spezialiste rekrutéiert, esou am 100,7-Interview de Generaldirekter Pascal Peters.
“Dat heescht alles wat d'Criminalité économique et financière ass, mee dann awer och de ganze Cyberberäich (...) An da brauch een natierlech immens vill Leit och am Support, also eeben am logistesche Support oder eeben och am administrative Support.”
D'Police géif gutt Aarbechtsconditioune bidden, huet de Pascal Peters ënnerstrach.
"Keen Element fir méi Onsécherheet zu Lëtzebuerg"
An der Police-Statistik vun 2024 geséich hie guer keen Element, datt Lëtzebuerg méi onsécher gi wier, esou de Generaldirekter vun der Police.
Dem Pascal Peters no géifen et awer méi Fäll vun haislecher Gewalt ginn.
“Dat heescht och do sinn d'Leit éischter bereet och Plainte ze féieren, ruffen d'Police, an déi Zuel ass awer och eropgaangen, mee do gëtt et nach eng separat Pressekonferenz, wierklech spezifesch zu deem Sujet.”
Suerge mécht de Police-Generaldirekter sech wéinst méi Abréch an Autoen, wou ganz vill Beschafungskriminalitéit hannendru wier. Där Fäll géifen et duerch dat ganzt Land ginn. De Pascal Peters huet dorun erënnert, datt ee keng Wäertsaachen am Auto soll loossen an den Auto ëmmer soll zouspären.
