D‘Caritas hätt vum Staat d‘Mandat kritt fir eng wichteg Aarbecht ze maachen, déi de Staat selwer net ka maachen an d‘Caritas hätt iwwer Joren eng virbildlech Aarbecht an deem Beräich gemaach.
"A mir hoffen natierlech, datt wann elo Liicht an d’Saach kënnt a erausfonnt gëtt, wat do alles geschitt ass, datt sech dat dann nees kann änneren."
De Premier Luc Frieden hat de Mëttwoch virun der Press gesot, d’Regierung wier net bereet d’Caritas weider finanziell ze ënnerstëtzen. D’Regierung wëllt awer dofir suergen, datt déi sozial Projeten, déi d’Caritas bedreift kënne viru gefouert ginn – noutfalls andeems se vun aneren Organisatiounen iwwerholl ginn.
Aner ONGe solidaresch mat der Caritas
Am Secteur vun den Entwécklungs-ONGe géif et keng Roserei op d’Caritas ginn, seet de Luc Siebenaller, well iwwer 60 Milliounen Euro bei der kathoulescher Organisatioun verschwonne sinn. Dat wichtegst wier, datt d’Hëllefsprojeten elo trotz der Bedruchsaffär kënne weider gefouert ginn, esou de Luc Siebenaller.
"Et kann net vun engem kriminellen Akt einfach alles zunichte gemaach ginn, wat do opgebaut ginn ass. Do si mir solidaresch ënnerteneen, a mir ënnerstëtzen natierlech d’Caritas op d‘mannst emol moralesch fir duerch déi schwéier Zäit ze kommen."