D‘Iwwergab vun de verstuerwenen Hamas-Geisele kéint Deeg oder Wochelaang daueren, esou den internationale Kommitee vum roude Kräiz. Et wier zum Deel schwiereg, fir se ënnert den Trümmer ze lokaliséieren, esou ee Spriecher.
Et wier och net ausgeschloss, datt verschidde Läichen ni fonnt géife ginn. D‘Hamas huet bis ewell eréischt 4 vun am Ganzen 28 doudege Geiselen zeréck ginn.
Trotz der neier Wafferou an der Gazasträif wieren iwwerdeems dräi Mënsche bei enger israeelescher Attack an der Stad Gaza ëm d‘Liewe komm. Dat mellt déi palästinensesch Noriichtenagence. Déi israeelesch Arméi huet matgedeelt, datt e puer Persounen ze no un israeelesch Posten erukomm wieren an eng Bedroung duergestallt hätten.
