Op där éischter Reunioun vum Lëtzebuerger EU-Agrar-Kommissär mat den Agrarministeren aus de 27 EU-Länner steet den Accord EU-Mercosur net offiziell um Ordre du jour. Et ass awer dee Sujet, deen an de Couloiren dominéiert.
Agrarministere waarden op den Text vum Accord
“Mir waarden op den Text, fir en am Detail ze analyséieren”, sou de Commentaire vum iresche Landwirtschaftsminister Charlie McConalogue, e Méindeg de Moie vrun der Reunioun.
Säi Land gehéiert zu deenen, déi skeptesch op deen Accord kucken, deen d’Europäesch Kommissioun Enn leschter Woch mat de véier Mercosur-Länner Paraguay, Uruguay, Brasilien an Argentinien ënnerschriwwen huet.
Och virop Frankräich, Éisträich a Polen hate Bedenken ugemellt. Ënnert där aktueller Form kéint een deen Text net ënnerstëtzen, hate souwuel déi polnesch, ewéi och déi italieenesch Regierung matgedeelt. Virun allem a Frankräich ginn zënter Wochen d’Baueren op d’Strooss, fir géint den Accord ze protestéieren. Dozou den neien EU-Agrar-Kommissär Christophe Hansen am 100Komma7-Interview: “Et ass keen, deen déi Protester ignoréiert. Bien au contraire.”
Trotz Protest: Agrarkapitel zënter 2019 onverännert
Am Mercosur-Accord wiere fir d’éischte Kéier an der Geschicht Garantien agebaut ginn, déi dofir suergen, datt d’Noutbrems kéint gezu ginn, sollt et zu Perturbatiounen um europäesche Marché kommen.
"Dat ass fir d'éischt Kéier an der Geschicht, dat sou eppes agebaut ginn ass. Natierlech, de Problem ass och deen, datt a verschiddene Memberstaaten et strukturell Problemer gëtt. Déi musse mir ganz kloer ugoen. An ech mengen, et ass och wichteg, datt mir driwwer schwätzen, datt et Opportunitéiten och fir de landwirtschaftlech Secteur gëtt. D'Mëllechwirtschaft, d'Wäinwirtschaft, déi wäerte profitéieren dervunner."
Um Text vum Accord gouf bal 25 Joer laang verhandelt. 2019 war et zu engem provisoreschem Accord komm. Dono gouf viru verhandelt an op béide Säite Konzessioune gemaach. Engersäits gouf an den Text agebaut, datt d’Klimaziler musse respektéiert ginn. Anerersäits goufe fir den Export vun Autoe verschidde Konditiounen integréiert.
D’Douanestaxen a Quote fir den Import vu landwirtschaftleche Produiten aus de Mercosur-Länner waren allerdéngs net Deel vun de rezente Verhandlungen iwwert den Text. Dat hat eng EU-Source leschte Freideg confirméiert.
Hansen: Kommissioun verhandelt op der Basis vum Mandat vu Memberlänner
Datt trotz de Protester vu verschiddenen EU-Länner näischt méi um Kapitel, datt d’Landwirtschaft betrëfft, geännert gouf, confirméiert och de Christophe Hansen.
"Den Agrardeel ass schonn 2019 ënnerschriwwe ginn. Un deem Punkt huet sech näischt geännert."
Déi néideg Sécherheete fir déi sensibel Secteure wieren “deelweis schonn agebaut ginn”, esou nach den CSV-Politiker.
"Op Mandat vum Ministerrot. Well dat däerf een net vergiessen: D'Kommissioun geet jo net einfach esou verhandelen. D'Kommissioun kritt ee Mandat fir ze verhandele vum Conseil. An d'Kommissioun ass der Meenung, datt déi dote Konditiounen, déi de Ministerrot wollt, erfëllt gi sinn. An do ass et elo d'Aarbecht rëm um Ministerrot an um Europaparlament, fir ze kucken, ob dat de Fall ass, an déi néideg Decisiounen ze treffen."
D’Fro, ob hien den Text dann elo schonn hätt, beäntwert de Christophe Hansen esou:
"Mir sinn nach am gaang déi Texter ze iwwerliesen. Mee si sinn natierlech nach net an all Sproochen iwwersat ginn. Dat huet elo och nach Zäit. Dat mussen d'Ministeren dann och a Kaf huelen, wa se net bereet sinn, op Englesch d'Texter ze studéieren."