Am sou genannte "Kompass fir Kompetitivitéit" sinn eng ganz Partie Gesetzer virgesinn, déi am Laf vun den nächsten zwee Joer solle virgeluecht ginn.
Een éischte Worf soll bannent e puer Méint presentéiert ginn. Detailer iwwer dat, wat genee proposéiert gëtt, si nach keng bekannt.
“Mir hunn ee Plang, elo kënnt et drop un, e séier ëmzesetzen”, sou d’Ursula von der Leyen op enger Pressekonferenz.
D’CDU-Politikerin huet och betount, datt d’Ziler vum Plang fir de Klimaschutz déi nämmlecht bleiwen. Et misst een awer flexibel bleiwen a pragmatesch op nei Entwécklunge reagéieren.
