Si wier mat dem Resultat op hirer éischter Elite-Weltmeeschterschaft deementspriechend zefridden, esou d’Marie Schreiber am 100,7 Interview.
Virun allem, well de Parcours mat Bulli, Trapen a Rampen ee vun den ustrengendsten vun der Saison gewiescht wier.
Ex-Weltmeeschtesch als nei Trainerin
Gehollef huet der Marie Schreiber och hir nei Trainerin. Zënter dëser Saison gëtt d’Lëtzebuergerin vun der Ex-Cyclocross Weltmeeschtesch Sanne Cant trainéiert. Vun hiren Erfarungswäerter kann d’Marie Schreiber villes léieren.
"Et si ganz vill divers Saachen, déi dat hëllefen vun der mentaler Säit e bëssen. Mee haaptsächlech och technesch, taktesch, wéi een d'Coursen ugeet, wéi e Profil mer fueren, wéi vill Loftdrock. Et si lauter Klengegkeeten am Fong, déi d'Leit vu bausse, soen ech mer, net direkt um Schierm hunn déi awer herno ganz vill Ënnerscheed kënne maachen."
Bis den 22. Februar geet d’Marie Schreiber nach bei sechs Cyclocross-Coursen an der Belsch un den Départ. Duerno preparéiert sech d'Lëtzebuerger Cyclistin dann op d’Stroossesaison.
