Fir datt d’EU hire Retard par Rapport zu China an den USA ophuele kann, solle weider grouss Rechenzentre geschaf ginn. Zil ass et, sou genannte KI-Factories op d’Been ze setzen. 13 där KI-Fabricken gëtt et schonn an der EU, eng dovun ass d’”MeluXina AI” zu Biissen. Geplangt ass och den Opbau vun nach méi groussen Entitéiten.
D’Kommissioun rifft d’EU-Länner elo dozou op, hir Kandidatur fir eng vun deene Giga-Fabricke bis Juni ze stellen. Am Ganze géifen dofir Investitioune vu bis zu 20 Milliarden Euro gebraucht.
