De Montant vun der Prime läit bei 250€ a wier onofhängeg vum Studiegang oder dem Diplom, huet d’DP Ministerin präziséiert. D’Reform vun de Studiebäihëllefe wier an Zesummenaarbecht mat der Associatioun vun de Studentencercelen ACEL ausgeschafft ginn a soll der sozialer an ekonomescher Situatioun vun de Studente a Studentinne méi gerecht ginn.
Méi Transparenz
Den neie Gesetzestext wier méi kloer an transparent wéi de viregten, ouni datt sech um Grondprinzip vun de Studiebäihëllefen eppes géif änneren, esou nach d’Héichschoulministerin Stéphanie Obertin.
"Déi 4 Boursë bleiwen, bestoen, wéi och de Prêt"
Et wieren Upassunge gemaach ginn un der Bourse de mobilité, esou wéi um Index. Den Index géif net méi just eemol d'Joer ugepasst, mee all Semester, esou d'Ministesch.
Vun 2 op 1,8 Prozent
Iwwerdeems géif den "Taux de prêt maximal", dee Studenten a Studentinnen op hirem Prêt bezuele mussen, vun 2 op 1,8 Prozent erofgesat ginn, esou d'Stéphanie Obertin. Et wier och entscheet ginn, datt:
"D'Majoratiounen, déi d'Frais d'inscription betrëffen, wéi och déi Majoratioun, déi d'Studente betrëfft, déi eng Situation exceptionnelle oder grave hunn, fir do och nach eng Kéier eppes dobei ze ginn."
De Gesetzesprojet zu der Reform vun de Studiebäihëllefen hat d'Héichschoulministesch Stéphanie Obertin virun 2 Wochen an der zoustänneger Chamberkommissioun deposéiert.
