Däitschland Zweeten Triell fir d'Bundestagswalen
Haut den Owend treffen d'Kandidate vun der Unioun, SPD an de Gréngen am zweete Kanzlertriell openeen. Besonnesch den Armin Laschet vun der CDU muss den Owend punkten, wann hien d'Kanzleramt nach wëllt am Bléck halen, mengt de Max Tholl.
A genee zwou Wochen ass d'Bundestagswal an haut kommen déi dräi Spëtzekandidaten Olaf Scholz, Armin Laschet an Annalena Baerbock fir den zweete Fernsehtriell zesummen. Den CSU-Chef Markus Söder hat virum Weekend scho kloergestallt: et ass déi lescht Chance, den Trend nach ëmzedréinen.
Well dësen ass de Moment net favorabel fir d'Uniounsparteien an hire Kandidat. Dem Insa-Sonntagstrend no kann d'SPD hire Virsprong ausbauen a läit elo mat 26 Prozent virun der Unioun mat 20 an de Grénge mat 15 Prozent. Bei der Kanzlerfro huet den Olaf Scholz souguer 17 Punkten Avance op d'Annalena Baerbock a ganzer 18 op den Armin Laschet.
Den Armin Laschet geet an d'Offensiv
No méintelaangen interne Streidereie gouf den Armin Laschet gëschter nach um CSU-Parteidag als staarke Kandidat gefeiert - e bëssen inzenéiert Harmonie fir nees Schwong an de Walkampf ze bréngen.
An och dem Laschet säin Toun vis-à-vis vum Olaf Scholz verschäerft sech. Bei allen Entscheedungen an der Nokrichszäit stoungen d'Sozialdemokraten op der falscher Säit, sot hie gëschter a senger Ried. D'SPD schéisst zeréck an nennt dem Laschet seng Aussoe "geschichtsvergessen" a "würdelos".
Den Olaf Scholz ënner Drock
Trotzdeem dierft et haut keen entspaanten Owend fir den Olaf Scholz ginn, well hien an d'Ermëttlunge géint eng Spezialunitéit vum däitschen Zoll verwéckelt ass, déi Informatiounen zu Geldwäscherei net weidergeleet soll hunn.
Als Finanzminister dréit hien hei Verantwortung. Leschten Donneschdeg gouf dofir och säi Ministère vun der Police duerchsicht. Et bitt sech also vill Ugrëffsfläch, déi den Owend sécherlech op alle Säite wäert genotzt ginn.
Méi zum Thema
Keng grouss Iwwerraschungen
Fir d'éischte Kéier hunn op der däitscher Televisioun dräi Kanzlerkandidatinnen a -Kandidaten debattéiert. Den "Triell" tescht Armin Laschet, Annalena Baerbock an Olaf Scholz ass awer ouni grouss Iwwerraschung bliwwen.
