Coronavirus Zweet Well huet ugefaang, soen d'Fuerscher

D'Neiinfektioune géife sech dem aktuelle Verlaf no bannent siwe bis aacht Deeg verduebelen. D'Infektioune wieren an der ganzer Populatioun ukomm a se géifen net just vun Infektiounsclustere gedriwwe ginn, schreiwe Fuerscher vun der Covid-Task Force.

Mëtt Mee bis Mëtt Juni wier et roueg gewiescht, esou de Constat. Den Ufank vun der zweeter Wëll situéiert d'Covid-Task Force op Mëtt Juni. Datt vu Mëtt Juni u méi positiv Tester gezielt goufen, hätt näischt mam Large-scale testing ze dinn. Deen hätt nämlech réischt richteg an den zwou éischte Juli-Woche gegraff well virdrun net vill Leit matgemaach hätten.

Exponentiell Croissance och ouni d'Testcampagne

D'Fuerscher hunn den Impakt vum Large-scale testing och erausgerechent: Ouni déi grouss Testcampagne géifen zwar manner positiv Fäll detektéiert ginn, mee den exponentielle Wuesstem wier änlech grouss. D'Neiinfektioune géife sech och ouni de Large-scale testing den Ament bannent 7 bis 8 Deeg verduebelen.

Aktuelle Simulatioune vun de Fuerscher no ginn et an eng bis zwou Wochen änlech vill Neiinfektioune wéi am Mäerz.

Reproduktiounstaux iwwer 1

Dem neiste Bilan no goufen um Dënschdeg 66 Neiinfektioune mam Coronavirus festgestallt, 10.101 Tester goufen duerchgefouert. Aktuell sinn 38 Persounen hospitaliséiert (-9), 4 dovun op der Intensivstatioun (+1). ​D'Zuel vun den Doudesaffer bleift weider bei 111. Den effektive Reproduktiounstaux läit nach ëmmer iwwer 1 (1,16). Zënter Mëtt Juni schonn. D'Covid-Task Force erënnert drun, datt d'Neiinfektioune klamme soulaang deen Taux iwwer 1 läit.