Landwirtschaft Zefridde Gesiichter nom Agrarsommet

Lauschteren

Schonn éier sech d'Vetrieder vun der Landwirtschaftskummer, der Bauerenallianz an den Jongbauere mat de Minister gesinn hunn, waren di kriddelegst Sujete vum Dësch. De Bauere war dat neit Agrargesetz en Dar am An.

Upassungen um Agrargesetz

Et setzt op Basis vun der europäescher Agrarpolitik de Kader vun der landwirtschaftlecher Aktivitéit a vum Primmesystem. Manner Véi a manner Zäregasen. Dat war de Credo vu Bréissel, deen zu Lëtzebuerg wéi gedoen huet. A fënnef konkrete Punkte war de Landwirtschaftsminister de Bauere mat Changementer um geplangten Text entgéint komm. De Luc Emering vun de Jongbaueren:

"Ech muss soen, datt dat Agrargesetz iwwer dat mir haut de Mëtteg diskutéiert hunn, dat ass en anert Agrargesetz wéi iwwer dat mir diskutéiert hunn, wéi déi Kräizer laanscht d'Stroosse stoungen. Eben aus deene Grënn, well mir Dialog haten."

En anerer kriddelege Punkt war d'Begrenze vun der maximaler Unzuel u Béischten, déi däerfe gehale ginn. Déi Grenz bleift zwar, ma d'Krittäre ginn dem Landwirtschaftsminister Claude Haagen no méi flexibel:

"Ech muss soen, datt mir zwou, dräi Réuniounne gebraucht hunn, datt mir Accorde kritt hunn an datt och d'Autorisatiounsprozedur par rapport zu der Uewergrenz vum Véibestand jo t'selwecht bleift, mat fënnef UTA'en, dat heescht den theoretesche Wäert dee geholl gëtt, fir dann de Véibestand ze kontrolléieren.

Mat engem règlement grand-ducal oder engem Artikel am Gesetz géing lo gekuckt ginn, wéi een en einfache Monitoring kann op d'Been stellen, esou de Claude Haagen. Domadder soll de Ministère dann och selwer kontrolléiere kënnen, op sech d'Emissiounswäerter vun de Betriber reduzéieren.

Sujet "Zukunftsdësch Landwirtschaft" gouf ugeschwaat

Et war awer trotzdeem net just e Meet and Greet gëschter zu Senneng. Sou goufen och nei Sujeten ugeschwat wéi zum Beispill d'Schafen vun engem Zukunftsdësch Landwirtschaft zesummen mat der Zivilgesellschaft an de Konsumenten. Ee Wee fir deen sech och d'Emweltministesch Joëlle Welfring ausgeschwat huet:

"Ech fannen déi Iddi vun dem Zukunftsdësch eng ganz, ganz gutt Iddi an eng ganz wichteg. Dat war och e Wonsch, deen ech och mat bruecht hat an dës Ronn, well et mir wichteg ass, datt mir, wa mir vun der Zukunft vun der Landwirtschaft schwätzen, net just op Autorisatiounen ziele fir iergendwéi Impakter am Grëff ze behalen."

Et géing drëms goen, d'Zukunft esou ze plangen, datt ee graduell all déi verschidden Ëmstellunge kéint ënnerhuelen, esou nach d'Joëlle Welfring.

Op verschiddene Punkten soll dann net nëmmen d'Agrargesetz, mee och d'Naturschutzgesetz ugepasst ginn. Dat gëllt zum Beispill fir d'Installatioun vun Photovoltaikanlagen an Traffoen an Gréngzonen.