Fir e Referendum iwwer d'Verfassungsreform Weider Informatiounen iwwer de Comité d'initiative
Vum iwwernächste Freideg (19. November) un a bis den 20. Dezember mat ass et méiglech op d'Gemengen ënnerschreiwen ze goe fir d'Demande fir d'Organiséiere vun engem Referendum iwwert d'Justiz-Kapitel vun der Verfassung z'ënnerstëtzen. Dat huet de Premier Xavier Bettel haut offiziell matgedeelt, a senger Kommunicatioun, déi an der Presse an am Journal Officiel verëffentlech gouf. Fir datt et an dësem Zenario zu engem Referendum kënnt, sinn op d'mannst 25.000 valabel Wieler-Ënnerschrëften néideg.
Zum Comité d'Initiative mat am ganzen aacht Memberen, dee beim Premier d'Organiséiere vun engem Referendum ugefrot hat, gehéiert de Gérard Koneczny, deen déi ëffentlech Petitioun lancéiert hat, mat der Demande no engem Referendum iwwert d'Verfassungsreform. Dës Petitioun, déi nach bis e Méindeg leeft, hate bis de Moie ronn 17.400 Leit ënnerschriwwen.
Wann dës Petitioun am Ganze 25.000 Ënnerschrëfte kritt, da wëllt d'CSV e Referendum "un d'Rulle bréngen", wéi de Parteipresident Claude Wiseler daz ugekënnegt hat, beim éischte Vott iwwert dat reforméiert Justizkapitel vun der Verfassung an der Chamber. D'Demande fir d'Organiséiere vum Referendum misst da vu méi wéi 15 Deputéierte gemaach ginn.
Méi zum Thema
Weider net kloer, ob Familljegrënnung e Grondrecht soll ginn
Déi véier Co-Rapportere fir déi geplangte Verfassungsrevisioun wäerte sech an den nächsten Deeg iwwerleeën, ob dat "neit Recht" eng Famill ze grënnen - wéi geplangt - als e Grondrecht an d'Verfassung stoe kënnt, sou d'Simone Beissel.
Informatiounsversammlung iwwer déi geplangt nei Verfassung
Véier Kapitele goufen ausgeschafft, fir d'Verfassung ze reforméieren. E Freideg hat d'Chamber eng éischten Informatiounsversammlung zur Verfassungsännerung organiséiert, wou d'Bierger hir Froen konnte stellen.
