Invité vum Dag "Wann d'CSV aus der EVP erausgeet, hu mir näischt méi ze soen"

Ufanks Mäerz sollen d'Verhandlungen iwwer een Handelsaccord tëschent der EU a Groussbritannien ufänken. E Méindeg hu sech béid Säiten een Duell geliwwert andeems se hir Positioune presentéiert hunn.

Dat, wat den EU-Chefnegociateur Michel Barnier sot, war deels de Contraire vun deem, wat de brittesche Premier Boris Johnson proposéiert huet.

Groussbritannie muss sech weider un d'EU-Reegelen halen, dat seet den CSV-Europadeputéierte Christophe Hansen. Hien ass Member vum Koordinatiounsgrupp vum Europaparlament fir d'Verhandlunge mat Groussbritannien.

Ëmwelt-, Sozial- oder Fiskaldumping ass een No-Go

An den Texter, déi vu Groussbritannien ënnerschriwwe goufen, wier de Principe de non regression festgehalen. Domat wier kloer, datt een och an Zukunft net kéint hanner déi Standarden zeréckgoen, déi den Ament gëllen. Allerdéngs géif et bis elo keng Garantie dofir ginn, datt Groussbritannie matzitt, wann d'EU hirersäits Reegelen ännert.

"Doriwwer gëtt vill gestridden. Et gëtt vill Leit am Parlament, déi een automateschen Alignement fuerderen. Allerdéngs fuerdere mir dat och vu kengem aneren Drëttland, dat heescht, do wäerte mir an Erklärungsnout kommen. Wat wichteg ass, datt si sech mussen un déi aktuell Standarden halen. Wa mir awer spéider eppes un de Reegelen änneren, musse mir kucken, ob si dat och wëllen."

Et wier net akzeptabel, datt an engem zukünftegen Handelsaccord keng Mindeststandarde fir den Ëmwelt- oder Klimaschutz oder sozial Rechter festgehale ginn, sou de Christophe Hansen.

D'Europaparlament stëmmt déi nächst Woch iwwer eng Resolutioun of, an där déi eege rout Linne festgeschriwwe ginn.

"Ob Sozial-, Ëmwelt- oder Fiskaldumping, dat ass fir eis ee kloren No-Go. Och den Dateschutz ass ee wichtege Punkt. Groussbritannien huet ugekënnegt, datt si vun eiser europäescher Dateschutzrichtlinn divergéieren. Och dat geet fir eis net."

Accord ass nach dëst Joer méiglech

Souwuel d'Europäesch Unioun wéi och Groussbritannien hunn een Interêt dorun, een haarde Brexit ze evitéieren. Dowéinst wier et net onwarscheinlech, datt d'Verhandlungen iwwer ee Fräihandelsaccord bis zum Enn vum Joer ofgeschloss sinn. Et kéint ee sech op déi nämmlecht Reegele baséieren, déi jo Groussbritannien als EU-Member mat definéiert huet.

D'Europäesch Kommissioun proposéiert een Handelsaccord, deen dono net muss vun nationale Parlamenter ratifizéiert ginn. Dat wier och bei aneren Handelsverträg de Fall, sot de Christophe Hansen.

"Bei deem, wat elo proposéiert gëtt, mussen déi national Parlamenter net gefrot ginn. Et kann awer sinn, datt si op deem engen oder anere Punkt musse gefrot ginn. Mee wa mir déi 40 national oder regional Parlamenter géife mat abannen, géife mir et sécher net méi dëst Joer packen."

CSV bleift an der EVP

Déi ungaresch Regierungspartei Fidesz Partei gëtt net aus der Europäescher Vollekspartei ausgeschloss. Zejoert am Mäerz war hir Memberschaft suspendéiert ginn, dat soll och weider sou bleiwen, gouf gëscht op engem Parteikongress zu Bréissel decidéiert.

D'Situatioun an Ungarn wier net besser ginn, sot gëschter den EVP-President Donald Tusk. Et gouf awer och keng Majoritéit dofir, Fidesz endgülteg aus der Partei auszeschléissen. Dofir hat sech déi Lëtzebuerger CSV, déi Member an der EVP ass, agesat. De Parteipresident Frank Engel hat op eiser Antenn gesot, seng Partei misst hir Memberschaft an der EVP iwwerdenken, wann d'Fidesz an der EVP bleift.

Aus der EVP erauszegoen hätt kloer Nodeeler, sou de Christophe Hansen:

"Wann d'CSV géif aus der EVP eraus a bei d'Membres non-inscrits goen, dann hätte mir absolut näischt méi ze soen. Da kéint ech net méi Rapporter vum Brexit sinn, etc. Fir mech ass et wichteg, datt mir an enger grousser Fraktioun sinn, fir op europäeschem Niveau eppes beweegt ze kréien."

An Zesummenaarbecht mat Euranet Plus, dem gréissten europäesche Radio-Reseau fir EU-Aktualitéit.