Gemengewahlen 2017 "Kandidatur wier de Wieler belunn"
D'Viviane Reding confirméiert, datt si net mat an d’Gemengewahlen 2017 geet. Als Europadeputéiert wier et net méiglech, gläichzäiteg eng gewëssenhaft Aarbecht an engem Gemengerot ze maachen, explizéiert d’CSV-Politikerin.
Den CSV-Parteipresident Marc Spautz hat jo um CSV-Nationalkongress am Mäerz 2016 een Opruff lancéiert, datt all CSV-Mandatairë mat an d’Gemengewahle solle goen. Am Prinzip wier dat eng richteg Decisioun, esou d’Viviane Reding. Allerdéngs misst eng Kandidatur och méiglech sinn, wat bei Europadeputéierten hirer Meenung no net de Fall wier.
Keng Kandidatur bei Gemengewahlen
A wéi engem Wahl-Bezierk si bei de Chamberwahlen 2018 untrëtt - ob am Süden oder am Zentrum - weess d’CSV-Europadeputéiert Viviane Reding eegener Ausso no iwwerdeems nach net. A béide Bezierker wier si scho mat an d’Nationalwahle gaangen.
Deen e Bezierk wier hir esou léif wéi deen aneren, huet d’Viviane Reding ënnerstrach. Deemno hätt si keng Preferenz ausgedréckt. Et wier also eng Decisioun vun der Partei, a wéi engem Bezierk si 2018 soll untrieden.
D’Viviane Reding war vun 1999 bis 2014 EU-Kommissärin. Zënterhier ass si erëm Deputéiert am Europaparlament.
Méi zum Thema
"Jidderee muss hëllefen"
Den CSV-President Marc Spautz hat all d'CSV-Mandatairen opgeruff, fir bei de Gemengewahlen ze kandidéieren. D’Europadeputéiert an eng Rei Chamber-Deputéiert kommen dem Opruff net no.
All potentiellen CSV-Spëtzekandidat sollt e Buch schreiwen!
30 CSV Memberen aus dem Dräikinneksgrupp fuerdere méi e schaarfe Profil fir d'Partei. All Interesséierter fir d'Spëtzekandidatur sollte kloer Positioun bezeien, esou dass ee weess, wat hier Iddie sinn, seet de Serge Wilmes.
