D'Reegel vu maximal dräi Musekanten (mat Blosinstrumenter), déi zesumme mat engem Dirigent prouwen dierfe, wier iwwerdeems fir déi allermannst Veräiner eng Optioun. Och wann hien dovun ausgeet, datt d'Recommandatioune vum Gesondheetsministère vun Experte géife formuléiert ginn, wiere fir hien déi aktuell Recommandatiounen am Beräich vun der Musek net einfach nozevollzéien.
"Wann ech déi Gesetzestexter liesen, déi si fir mech dacks vill méi prezis geschriwwen, wat sportleche Aktivitéiten ubelaangt, wéi wat d'Kultur ubelaangt. Op där anerer Säit muss een och soen: Am Sport ginn et x Federatiounen, d'UGDA ass eng vun de Federatiounen am kulturelle Beräich, wou et der net esou vill ginn. Trotzdeem: Mir wëllen à pied d'égalité behandelt ginn, wéi de Sport an och déi selwecht Informatiounen kréien, fir datt mer se kënne weiderhiinn un eis Memberen."
Och wann de Kongress vun der UGDA e Sonndeg iwwer Videokonferenz ganz roueg verlaf wier, géif et ënner de Veräiner, déi an der UGDA federéiert sinn, eng gewëss Onzefriddenheet ginn, well hir Aktivitéite wéinst de strenge sanitäre Reegelen, déi vum Staat imposéiert ginn, onméiglech oder op d'mannst ganz schwiereg gemaach ginn.
