Medezinesch Interventiounen Sträit tëscht AMMD an der Santé
D'Doktesch- an Zänndoktesch-Associatioun AMMD iergert sech iwwer eng Circulaire vun der Santés-Direktioun, déi gëschter Mëtten un d'Doktere gaangen ass. An engem Communiqué un hir Memberen, deen eis virläit, schreift d'AMMD datt dës Circulaire zu engem schlechten Zäitpunkt kënnt. Et hätt een dofir eng dringend Entrevue mat der Gesondheetsministesch Paulette Lenert ugefrot.
De Bäitrag vum Stephan Polet lauschteren
An dem Bréif un d'Dokteren schreift den Direkter vun der Santé, Jean-Claude Schmit, datt him zu Ouere komm wier, datt verschidden Dokteren an Zänndokteren nees Patienten géife behandelen, a Fäll déi weder urgent nach schlëmm wieren. Cabinetë mat liberalem Statut sollten an dësen Zäiten awer nëmmen esou urgent a schlëmm Fäll traitéieren. Esou de Jean-Claude Schmit, deen d'Dokteren och drun erënnert, datt d'Santé Kontrollen duerchféiert a Strofe bei Verstéiss virgesi sinn.
Haut de Moien dunn déi veriergert Reaktioun vun der AMMD: De Bréif vun der Santé wier a Form, Toun an Inhalt onglécklech. Dat an enger Phase, wou all Efforten misste gemaach ginn, fir nees méi Krankheeten, déi näischt mat dem Corona-Virus ze dinn hunn, ze behandelen. D'Doktesch-organisatioun schreift hire Memberen och, datt ee schonn de 14. Abrëll d'Gesondheetsministesch Paulette Lenert op dës Thematik ugeschwat hätt an och de Santés-Direkter informéiert wier.
D'Ministesch hätt esou eng Démarche deemno mëndlech an och an der Press ënnerstëtzt.
Déi meescht Dokteren géife sech un d'Reegelen halen an sech um Kampf géingt de Corona-Virus bedeelegen. Esou d'AMMD. Et hätt een elo eng Entrevue mat der Paulette Lenert gefrot, fir iwwert eng Situatioun ze schwätzen, déi- Zitat- net ouni Konsequenze bléiwe kann.
