Wirtschaft Steet Kanada virun enger Immobiliekris?

Eng an eng hallef Milliounen Dollar. Dat ass den duerchschnëttleche Präis fir een Eefamilljenhaus an der kanadescher Metropol Toronto. Dat ass beim aktuellen Taux de Change bal eng Millioun Euro. Eng grujeleg Realitéit fir vill jonk Familljen, déi do hiert éischt Haus wëlle kafen.

Astronomesch Präisser wéinst Spekulatioun

Den Haaptproblem ass ouni Iwwerraschung d'Spekulatioun, déi d'Präisser an astronomesch Héichten dreift. An der Groussregioun vun Toronto sinn d'Lëschte-Präisser vun den Haiser an Appartementer an engem Joer ëm méi wéi 30 Prozent geklommen. Souguer de Gouverneur vun der kanadescher Zentralbank sot Mëtt Abrëll a sengem Rapport iwwert d'Währungspolitik, datt d'Nofro méi vun der Spekulatioun an den auslänneschen Investisseuren ugedriwwe gëtt, wéi vun de Leit, di sech een Haus wëlle kafe fir dran ze wunnen.

Ëmmer manner Experte zécke méi fir vun enger Immobilie-Blos ze schwätzen. De kanadesche Marché géing deem vun den USA a Spuenien gläichen, ier do d'Präisser drastesch gefall sinn. Och d'Ratingsagence Moody's sot rezent, datt Kanada ee vun de véier Staate mat der 'Triple A' Bewäertung ass, deenen hiren Immobiliemarché ufälleg fir ee Präis-Schock ass.

Géigemoosnamen

D'Stad Vancouver, déi mat engem ähnleche Problem kämpft, huet leschte Summer Moossnamen ergraff fir d'Spekulatioun ze bremsen. Toronto huet sech am Abrëll dorunner ee Beispill geholl. D'Stad huet eng Taxe vu 15 Prozent fir auslännesch Investisseuren agefouert an d'Hausse vun de Loyerspräisser limitéiert. Doriwwer eraus kruten d'Gemengen d'Méiglechkeet fir Steieren op de Proprietéiten z'erhiewen, déi eidel stinn.

Mee Kritiker warnen elo schonn, datt dës Moossnamen net vill wäerten déngen. Zu Vancouver hätte se zwar d'Hausse vun de Präisser gebremst, mee den Effekt wier nëmme vu kuerzer Dauer gewiescht. Am Mee gouf et éischt Unzeechen, datt de Marché zu Toronto sech berouegt hätt, soen Experten. De konkreten Effekt vun de Mesurë géif sech awer eréischt iwwer déi nächst Méint weisen.

Sécher ass, datt wann d'Immobilie-Blos zu Toronto platzt, d'Ekonomie vu Kanada ee grousse Problem hätt. D'Ekonomie vun der Groussregioun Toronto stellt nämlech 20 Prozent vum PIB vum Land duer. A mat de Schwieregkeeten an der Pëtrolsindustrie, wou d'Präisser stagnéieren, kéint Kanada mat enger Immobiliekris an d'Rezessioun falen, esou Experten.

Op Montréal plënneren?

Nach ass awer kee Grond fir ze panikéieren. D'Zentralbank mengt, datt di héich Verscholdung vun de Kanadier an d'Héije vun den Zënssätz op laang Dauer de Marché wäerte berouegen.

Bis d'Präisser dann erëm falen, gëtt et awer nach eng aner Léisung fir déi Leit, déi bei deenen héijen Immobiliepräisser nëmmen de Kapp kënne rëselen. An zwar an déi franséischsproocheg Metropol Montréal ze plënneren. Hei kaschten Immobilien nach am Duerchschnëtt d'Halschent vun deem, wat se zu Toronto wäert sinn.