Revisioun vun der Verfassung Staatsrot: Onofhängegkeet vum Parquet an d'Verfassung
De Staatsrot plädéiert dofir d'Onofhängegkeet vum Parquet fest an der Verfassung ze verankeren. E widdersprécht domat der Chamber a kritiséiert se schaarf, well si an hirer Propositioun fir eng Revisioun vum Kapitel iwwer d'Justiz drop verzicht hat, ausdrécklech an den Text ze schreiwen, datt d'Procureuren onofhängeg sinn.
Well a Verfassungsfroen eng zwee Drëttel-Majoritéit néideg ass, hunn déi aner Fraktiounen dem Drock vun der CSV op deem Punkt noginn.
Déi gréisst Oppositiounspartei wollt am finalen Text keng Onofhängegkeets-Formulatioun fir de Parquet méi matdroen.
D'Argumentatioun vum Conseil d'État zu deem Punkt zitt sech iwwer 14 Säiten, also gutt zwee Drëttel vun deem 22 Säite staarken Avis.
Op eng Opposition formelle verzicht en, well dat Instrument am Fall vun der Constitutioun souwisou net spillt: iwwer Verfassungsännerunge muss egal wéi zweemol am Parlament ofgestëmmt ginn.
Méi zum Thema
Kommentar
"Hutt dir soss näischt ze dinn?"
D'CSV wëllt wéinst hirem Sträit mat der Procureure générale der Onofhängegkeet vum Parquet kee Verfassungsrang méi ginn. Dat ass keng Reklamm fir déi gréisst Oppositiounspartei, mengt d'Michèle Sinner.
Onofhängegkeet vum Parquet kënnt wuel net an d'Verfassung
De Léon Gloden schléisst trotz de ville kriteschen Avisen aus, datt awer nach eng total Onofhängegkeet vum Parquet als Prinzip an d'Verfassung stoe kënnt. D'Opportunité des poursuites kéint awer explizitt dra kommen.
