#chamberleak Staat u Whistleblower: "Mellt Iech!"
Internetnotzer, déi Sécherheetslacunen a staatleche Systemer entdecken, sollen d'Faillë mellen, esou de CTIE. Domat reagéiert de staatlechen Informatikservice op eng 100,7-Meldung.
E Whistleblower huet erausfonnt, datt ee mat wéineg informatesche Kenntnisser op enger staatlecher Internetplattform un d'Passwieder vun den iwwer dausend Notzer komme kann, och vu Ministeren, Deputéiert a Beamten. Well d'Persoun keng Garantie krut, datt keng Plainte géint se gemaach gëtt, huet si de Feeler ni gemellt. D'Sécherheetslacune besteet eventuell haut nach.
Gemeinsamen Intérêt
De CTIE-Direkter Gilles Feith huet de radio 100,7 kontaktéiert fir en Appell un dësen an aner Whistleblower ze maachen. Wien op Sécherheetslacunen opmierksam gëtt, soll déi anonym mellen. De CTIE géif dat eescht huelen, vertraulech behandelen a probéieren, de Feeler sou séier wéi méiglech ze behiewen. De Gilles Feith seet, hie wéilt d'Systemer sou sécher wéi méiglech maachen.
De Whistleblower, deen un de radio 100,7 erugetruede war, sot eis nom Appell vum Gilles Feith, hie wéilt de Feeler nach ëmmer melle wann hie legal ofgeséchert wier. Béid Säite wëllen deemnächst Kontakt mateneen ophuelen.
Wéinst enger gréisser Sécherheetslacune um Internetsite vun der Chamber ass d'Diskussioun iwwer d'Sécherheet vun de perséinlechen Donnéeën an Zäite vun der Digitaliséierung relancéiert.
Méi zum Thema
Schwaache Whistleblower-Schutz am Internet
Dem radio 100,7 läit e Fall vir vun enger Sécherheetslacune op enger staatlecher Internetplattform. Si gouf net behuewen, well de Whistleblower kee Schutz viru penale Sanktioune garantéiert krut.
Exklusiv
Sécherheetslacunen op chamber.lu
Um Internetsite vun der Chamber ware bis e Mëttwoch den Owend eng ganz Partie intern a sensibel Dokumenter net adequat geséchert. Dat weise Recherchë vum radio 100,7.
