Déi leschte Kéier, datt Sporting Portugal Champion gouf, war 2002. deemools goufen et nach keng Smartphones an zu New York goufen nach d'Ruine vum World Trade Center opgeraumt.
Zanterhier huet Sporting just véiermol déi portugisesch Coupe gewonnen, eng enttäuschend Zäit fir e Veräin mat groussen Ambitiounen. Mee mat engem momentane Virsprong an der Tabell vun néng Punkten, mat nach zwielef Matcher ze spillen, kéint et dëst Joer endlech nees klappe mam Championstitel.
De Simon Larosche ass de Sëtz vum Sporting-Supporterclub hei am Land besiche gaangen an huet sech mat fervente Fans ënnerhalen, déi endlech nees aus dem Schied vu Benfica an FC Porto wëllen erauskommen.
