Medezineschen Offall Spannunge wéinst Offallverwäertung vu Covid-19-Schutz-Material

Zanter zwee Méint gi ronn dräi Tonne medezineschen Offall pro Woch an der Verbrennungsanlag vum SIDOR verbrannt. D'Zeitung vum Lëtzebuerger Vollek hat rezent gemellt, datt de SIDOR am Ufank vum Etat de crise wéinst der Corona-Pandemie dozou gedréckt gi wier, dës Offäll unzehuelen, obwuel de Syndikat deen Ament nach net déi néideg Autorisatioun hat. Mëttlerweil huet sech d'Situatioun tëschent de Betraffene gekläert, heescht et op Nofro hin.

Rahel Könen / cz

Medezineschen Offall
Foto: Bigstock / SiriratM

D'Zeitung vum Lëtzebuerger Vollek hat viru Kuerzem geschriwwen, datt d'Cellule de Crise dem SIDOR mat der Arméi gedreet hätt, sollt de Syndicat sech weigeren déi entspriechend Offäll unzehuelen. De Patrick Goldschmidt, Stater DP-Schäffen a President vum SIDOR, seet, hie wier bei dëser Ausernanersetzung, selwer net dobäi gewiescht, mee hien hätt d'Situatioun awer esou zougedroe kritt. Et wier een am Etat de Crise gewiescht, an et hätt ee missen eng Léisung fannen, esou de SIDOR-President. De Patrick Goldschmit seet awer och: "Fir et fein ze soen, heiansdo hätt een anescht matenee kënnen ëmgoen."

Ufanks wier net jiddwerengem kloer gewiescht, ëm wéi eng Zort vu medezineschem Offall et sech bei der Demande gehandelt hätt. Dat hätt zum Mëssverständnes bäigedroen, esou de Patrick Goldschmidt.

"A wéi dat sech alles gekläert hat, war dat fir eis net normalen Offall, mee net méi den 100 Prozent medezineschen Offall, wou mer vu Sprëtzen, Medikamenter, Utensilien déi an Operatioune gebrauch ginn, deen ass do ganz kloer net dobäi gewiescht."

Et huet séier eng Léisung misste fonnt ginn

Aus Suerg, d'Lëtzebuerger Spideeler géife wärend der Kris mat enger Onmass un Offall iwwerlaascht ginn, hätt d'Cellule de crise séier no enger nationaler Léisung gesicht. De SIDOR wier deemno gefrot gi fir Schutz-Material vu medezineschem Personal an der Anlag tëschent Leideleng an Obeler mat ze verbrennen. Dat confirméiert och de Robert Schmit, Direkter vun der Ëmweltverwaltung. De Risiko hätt bestanen, et huet ee missten dovun ausgoen, datt d'Nopeschlänner hir Grenzen zoumaachen, an datt een déi Offäll iergendwou misst stockéieren. "Dofir war d'Suerg scho relativ séier eng Léisung ze fannen."

Den Ament vun der Ufro hätt de SIDOR awer nach net déi néideg Autorisatioun vun der Ëmweltverwaltung gehat. "Et gëtt en Offall-Katalog mat Codë vun deenen eenzelen Offall-Kategorien an do war an där Lëscht, déi de SIDOR huet, deen doten Offall Code net mat dran. An dofir ass dunn dee Code dobäi gesat ginn", esou den Direkter vun der Ëmweltverwaltung.

Déi néideg Sécherheetsmesurë fir d'Personal goufen en place gesat

An enger Ausnamesituatioun wier et der Ëmweltverwaltung méiglech dës Offall-Lëscht ze erweideren. Et wier u sech normalen Offall, deen normalerweis an enger Hausmüllverbrennungsanlag ka verbrannt ginn. "Dat ass um technesche Punkt kee Problem. Et war just gekuckt ginn, wéi kann dat duerno an den Uewen erageholl ginn, ouni elo do Problemer ze maachen."
Virun allem de Schutz vu Personal wier ufanks eng Suerg gewiescht. Mee bannent zwou Woche goufen och déi néideg Sécherheetsmesuren en place gesat, esou de Patrick Goldschmidt, President vum Sidor.
"D'Personal beim Bedreiwer gouf extra geschoult. D'Material koum extra verpak op de SIDOR-Site, an dat ass bis elo reiwungslos iwwer d'Bün gaangen. Mee et ass kloer Material, dat an d'Ausland gaangen ass. An dat elo wärend dem Etat de crise beim SIDOR verbrannt gouf."

SIDOR krut déi néideg Autorisatioun

No engem schwéiere Start hätte sech d'Fronten tëschent de Betraffenen domat gekläert an eng Léisung wier fonnt ginn.
"D'Resultat war esou, datt mer eng Autorisatioun kruten, an datt et net alles medezineschen Offall ass, mee datt et sech hei haaptsächlech ëm Masken, Kostümer an Händsche gehandelt huet, wou am Ufank d'Angscht war, datt dat dräi bis véier Tonnen den Dag wären. Gottseidank koum d'Kris net grad esou schlëmm, wéi mir gefaart hunn, esou datt mer am Moment beim SIDOR ongeféier dräi Tonnen d'Woch medezineschen Offall unhuelen, fir dee mir och d'Autorisatioun kritt hunn."
De President vum SIDOR geet awer dovun aus, datt nom Etat de crise den entspriechenden Offall nees mam Rescht vum medezineschen Offall am Ausland entsuergt gëtt.

An der Mediathéik:

Aktuelles / / Rahel Könen
Lauschteren

Méi zum Thema

Julien Ambrosius, Michèle Sinner
Corona-Kris

Zanter de Spezialmesurë géint de Coronavirus huet sech d'Aarbecht beim Service d'hygiène vill verännert. Mee och d'Astellung vis-à-vis vun de Mataarbechter. Mir hu si op hirem Tour begleet.

Medezineschen Offall
Medezin

Lëtzebuerg sicht no innovative Weeër fir medezinesch Offäll ze verwäerten. Eng nei Technologie aus Brasilie versprécht eng méi ekologesch a lokal Léisung. De Centre Hospitalier zu Esch wëllt bei engem Testprojet deelhuelen.

Net verpassen

Programm

Dossieren

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen