REMBOURSEMENT VUN DER PSYCHOTHERAPIE Sozialminister: CNS wëll weider no enger Léisung mat der Fapsylux sichen
De Sozialminister Romain Schneider sot eis, sengen Informatiounen no géif d'CNS sech deemnächst bei der Fapsylux melle fir eng Léisung ze sichen, am Dossier ronderëm de Remboursement vun der Psychotherapie.
Déi schwiereg Verhandlungen iwwer eng Konventioun tëscht CNS a Psychotherapeute leien de Moment op Äis. D'Fapyslux, d'Federatioun vun de Psychotherapeuten, wënscht sech eng méi inklusiv Léisung a verdeedegt hir Fuerderungen no méiglechst vill Fräiheet fir all Assuréen.
De Minister Romain Schneider seet, hie géif sech aus de Verhandlungen eraushalen, wënscht sech awer elo eng séier Léisung, well och déi betraffen Assuréeë géifen op ee Remboursement vun der Psychotherapie waarden. Iwwer d'Usätz fir aus dem Konflikt erauszekomme seet hien:
"E soll geléist ginn andeems ee sech verstänneg nach eemol zesummesetzt, datt een déi zwee Pabeieren déi een huet - deen aus der Mediatioun erausgaangen ass, wou d'Psychotherapeuten, d'Fapsylux, ëmmer gesot hunn, dat ass ee Pabeier dee ganz no un eise Virstellunge läit, an op der anerer Säit alles dat wat elo opgeschafft gouf an de Verhandlunge vun de leschte Wochen, nach eemol nieftenee leet a kuckt eben ze probéieren aus deenen zwee Pabeieren eng Konventioun ze kréien, déi fonctionéiert an déi de Startschoss gëtt fir an der Nomenclature déi richteg Tariffer drop ze setzen."
D'Presidentin vun der Fapsylux, Delphine Prüm hat um Mëttwoch ze verstoe ginn, d'Federatioun wier net averstane mat der aktueller Positioun vun der CNS an de Verhandlungen. Mee de Ball léich awer elo bei der Gesondheetskeess.
Méi zum Thema
Fapsylux fuerdert d'CNS op fir d'Verhandlungen erëm opzehuelen
D'Federatioun vun de Psychotherapeuten, Fapsylux, hofft datt d'Verhandlunge mat der Gesondheetskeess iwwer de Remboursement vun der Psychotherapie séier erëm ukommen. De Besoin fir Prise en chargë bei engem Psychotherapeut wier aktuell grouss.
Fapsylux: Propos vun der CNS geet net wäit genuch
D'Fapsylux kritiséiert, datt d'CNS en direkten Accès op d'Psychotherapie just am Fall vu liichte a moderate Probleemer wéilt rembourséieren. Dat géif net deem entspriechen, wat an den aktuelle Verhandlunge zur Debatt géif stoen.
"Dat ass keng Konventioun méi"
De Sozialminister Romain Schneider huet e groussherzoglecht Reglement iwwer de Remboursement vu psychotherapeutesche Seancen ausgeschafft. D'Delphine Prüm, Presidentin vun der Fapsylux, kritiséiert dëse Projet.
