Gemengewahlen "Mir maachen zu Sëll keng Parteipolitik"
Déi klengste Gemeng am Land wëll och an noer Zukunft net mat enger anerer Gemeng fusionéieren. Et hätt ee wéineg finanziell Ressourcen an et wier een op staatlech Hëllef ugewisen, seet de Buergermeeschter vu Sëll, de Raoul Clausse. Zesumme mam Gemengerot Jean Konsbruck fuerdert hie méi Ënnerstëtzung vun der nationaler Politik, fir wirtschaftlech kënnen ze wuessen.
Sëll ass mat 780 Awunner déi klengste Gemeng am Land. 2009 gouf et zu Sëll e consultative Referendum. D'Bierger haten sech mat 50,2 Prozent prinzipiell géint eng Fusioun mat enger Nopeschgemeng ausgeschwat. Den Ament wier eng Fusioun och keen Thema, esou de Sëller Buergermeeschter Raoul Clausse. Hie schléisst awer net aus, datt wann d'Bierger et wënschen, an Zukunft erëm driwwer nogeduecht gëtt.
An der Vergaangenheet, ënnert dem CSV-Inneminister Jean-Marie Halsdorf, wier den Drock fir ze fusionéiere méi grouss gewiescht. Dat wier ënnert dëser Regierung net méi de Fall.
Keng Fusioun, finanziell ofhängeg vum Staat
"Eng selbstänneg Gemeng kann hire Bierger eppes bidden", seet de Buergermeeschter. Hie weist drop hin, datt Sëll Member am Syndikat "Réidener Kanton" ass. Do kéint ee Servicer offréieren, déi souguer mëttelgrouss Gemengen net kéinten ubidden. Bei de Gemengefinanze wier een op Recettë vum Staat ugewisen, an doduerch zimlech limitéiert, esou de Gemengerot Jean Konsbruck.
Als kleng Gemeng misst een awer och eegen ekonomesch Entwécklungsméiglechkeeten hunn. Et géif ee vun der nationaler Politik gebremst ginn, kritiséiert och de Buergermeeschter Raoul Clausse. Esou hätt den Nohaltegkeetsministère engem lokale Betrib aus landesplanereschen Ursaache verbueden ze wuessen. Béide Gemengepolitiker no wier dat eng falsch Entscheedung gewiescht. Grad am ländleche Raum misste kleng Betriber eng Zukunft hunn.
D'Reform vun de Gemengefinanzen hätt e substantiellen Impakt op d'Gemeng Sëll gehat, mat 200.000 Euro manner Recetten, erkläert de Gemengeconseiller Jean Konsbruck. Den Ament kritt Sëll eng finanziell Kompensatioun, seet de Buergermeeschter. Wéi laang dat nach dauert, wéisst een awer net.
An der Mediathéik:
LauschterenMéi zum Thema
36 vun 60 Deputéiert och an engem Gemengerot
Déi duebel Mandater vu Chamber-Deputéierten a Gemenge-Conseillere sollen ofgeschaaft ginn. Dat haten déi dräi Regierungsparteien LSAP, DP an déi gréng 2013 an hire Wahlprogrammer stoen.
"Et geet net drëm just Lëschten ze fëllen"
Et ass net schwéier eng Lëscht ze fëllen, soen Vertrieder vun de Parteien. Mä et wier méi schwéier eng gutt an ausgeglache Lëscht zesummenzesetzen. Den Haaptgrond dobäi wier d'Zäit.
