Klimaschutz Schüler diskutéiere mat Politiker

D'Schüler déi e Mëttwoch op de Campus Geesseknäppche komm sinn, konnten a Workshoppen hir Froe stellen an Iddien erabréngen, erkläert de Kimon Leners, President vun der CNEL.

D'Workshoppe waren an dräi Themekomplexer agedeelt: Een, dee sech mat der Schoul ausernee setzt, een iwwer d'Doheem an en drëtte Workshop setzt sech mam Konsumverhalen an der Produktioun auserneen.

Et goung de Schüler dobäi ëm hir Zukunft an eventuell déi vun hire Kanner, et wéilt een "näischt Schlechtes" hannerloossen. Kloer ass: Et muss eppes geännert ginn.

Jiddweree soll matmaachen

E Mëttwoch war dat éischt an enger Réi vu fënnef Treffen uechter d'Land. D'Iddien, déi hei zesumme kommen, sollen dann an de nationale Energie- a Klimaplang afléissen.

Dem Educatiounsminister Claude Meisch war et wichteg, datt jiddwereen d'Chance hat matzemaachen. "Dofir hu mir och Online en Diskussiounsforum ageriicht, wou ee seng Propose kann erareechen."

D'Ëmweltministesch Carole Dieschbourg weist sech ganz impressionnéiert vum Wësse vun de Schüler, a "wéi vill Gedanke si sech gemaacht hunn". Ähnlech huet och de Landwirtschaftsminister Romain Schneider geäussert: et géif elo drëm goen d'Iddien eraus ze kristalliséieren an ze kucken, wéi een an der Politik dorop misst reagéieren.

"Net just iwwer Saache schwätzen"

Déi meescht Schüler hu sech nom Austausch positiv gewisen. Et hätt ee sech inspiréiert gefillt. Begréisst gouf, datt jiddweree seng Iddie konnt erabréngen, an der Hoffnung, datt een och eescht geholl gëtt.

Um Enn goufen et awer och méi kritesch Stëmmen: sou géif een dacks iwwer déi selwecht Theme schwätzen, mee et misst sech direkt eppes änneren an et misst een net just iwwer Saache schwätzen.

Et ginn nach aner Treffen tëscht Schüler a Politiker organiséiert, ënner anerem zu Dikrech, an der Stad, zu Gréiwemaacher an zu Diddeleng.