Geheimdéngscht Reitz a Geisler solle SREL-Archiven opschaffen
D'Historiker Jean Reitz an Nadine Geisler goufe beoptraagt, fir d'SREL-Archiven aus de Joren 1960 bis 2001 opzeschaffen. Déi Informatioun huet de Staatsministère eis op Nofro hi confirméiert. Den Optrag leeft vum 1. Juni 2017 bis den 31. Mee 2019.
Datt déi al Archive sollen opgeschafft ginn, hat d'Geheimdéngscht-Enquêtëkommissioun 2013 an hirem Ofschloss-Rapport esou gefuerdert. Zejoert ass een entspriechend Gesetz gestëmmt ginn, wou de Kader fir d'Aarbecht vun den Historiker definéiert gëtt. Si ginn an hirer Aarbecht begleet duerch een Evaluatiounscomité.
Am Evaluatiounscomité vertruede sinn:
- Fir d'Chamber, de Serge Wilmes (CSV) an de Gusty Graas (DP)
- Fir d'Regierung, d'Josée Kirps (Nationalarchiven) an de Jeff Fettes (Staatsministère)
- Fir d'Uni Lëtzebuerg, den Andreas Fickers an de Benoît Majerus
Et goufen dräi Kandidature vu Fuerschergruppen mat all Kéiers zwee bis dräi Historiker.
De Jean Reitz war tëscht 2003 an 2016 Direkter vun der Agence Luxembourgeoise d'Action Culturelle (Alac). Zesumme mam Nadine Geisler an aneren Historiker huet hie rezent zu Käerjeng eng Ausstellung iwwert den Éischte Weltkrich mat realiséiert. Fuerschungsschwéierpunkte vum Nadine Geisler ware bis ewell d'Fraebewegung an de Geschichtsunterrecht an de Schoulen.
Méi zum Thema
Meenung
SREL: Never Again? Schéi wier et!
Déi aktuell Affär ëm eng illegal SREL-Ecoute weist, datt sech d'Attitude vun der Politik a Punkto Geheimdéngscht iwwerhaapt net geännert huet. E Kommentar vum Jean-Claude Franck.
Ee Gesetz, een Trojaner an ee Stuerm am Waasserglas
Dräi Joer no der SREL-Affaire gouf nees iwwert de SREL diskutéiert: Iwwer den neie legale Kader, iwwer d'Affaire Bettel-Kemmer an iwwer Staatstrojaner. Ee Réckbléck mat de wichtege Punkten.
Exklusiv
Mam Accord vu Riichter, Staatsministère a Kontrollkommissioun
De SREL benotzt 100,7-Informatiounen no schonn zënter 2011 Trojaner fir Leit z'iwwerwaachen. D'Politik weess méi, wéi se bis haut zouginn huet. An déi juristesch Basis ass ëmstridden.
En neit Gesetz fir eng nei Archivkultur
D'Direktesch vun den Nationalarchive Josée Kirps begréisst dat geplangten Archivgesetz. An der Dreckskëscht soll just nach dat landen, wat net méi gebraucht gëtt. Mee wat mat den ale SREL-Archive geschitt, bleift ongewëss.
