Handwierkerfederatioun Prioritéit: Ausbildung
D'Beruffsausbildung an d'Orientatioun mussen eng Top-Prioritéit vun der nächster Regierung ginn, seet de Romain Schmit. De Generalsekretär vun der Handwierkerfederatioun zitt e gemëschte Bilan vun der aktueller Regierung. Anescht wéi déi viregt, wär blo-rout-gréng disponibel fir Changementer gewiescht.
"Ausbildung, Ausbildung, Ausbildung" äntwert de Romain Schmit op d'Fro, wat aus der Siicht vun der Handwierkerfederatioun, déi dräi Prioritéiten, fir déi nächst Regierung solle sinn.
D'Orientatioun an en Handwierk soll e Choix sinn, an net d'Resultat vun engem schouleschem Echec, seet de Romain Schmit. Fir de Generalsekretär vun der Handwierkerfederatioun sollen an Zukunft och Bachelorsausbildunge fir Handwierker méiglech ginn.
De Staat misst Plaze schafe fir Leit mat niddereger Ausbildung. D'Handwierk kéint déi Leit net eleng opfänken. "Mir sinn net de Reparaturbetrib vun dëser Gesellschaft."
Gemëschte Bilan fir blo-rout-gréng
Dës Regierung hätt eng méi grouss Disponibilitéit fir de Changement gehat, wéi déi virdrun, seet de Romain Schmit. Et wier vill geschitt, mä net alles wier richteg gewiescht. D'Verhandlungen iwwert d'Aarbechtszäit wiere schmäerzvoll fir d'Patronatsorganisatioun gewiescht. Ganz positiv wier de Kontakt mam Wirtschaftsministère, "mat deem mir exzellent fueren".
Hausse vu Mindestloun keng Léisung
Zur Fuerderung vum OGBL, fir de Mindestloun ëm zéng Prozent ze héijen, seet de Romain Schmit: "Mir kennen d'Mindestléin héijen, souvill wéi mir wëllen. Domadder kréie mir net d'Problemer vun all de Leit am Land gereegelt, wat d'Wunnen ugeet". Dat wier den Haaptproblem.
Eng Erhéijung vun den Ufanksgehälter beim Staat, sou wéi d'Staatsbeamtegewerkschaft CGFP dat fuerdert, géif Problemer schafen. "Méi héich Salairë beim Staat verschäerft d'Konkurrenz tëscht Staat a Privat-Secteur".
An der Mediathéik:
LauschterenMéi zum Thema
"Formatioun ass Assurance géint de Chômage"
D'Aschreifkäschte fir de Brevet de Maîtrise sinn elo dräi Mol méi deier. D'Formatioun ass opgewäert ginn, argumentéiert de Vize-Generaldirekter vun der Handwierkerkammer Charles Bassing.
Gemëschte Bilan fir d'Regierungspolitik
D’Handwierkerfederatioun begréisst déi geplangten 90 Milliounen Euro Finanzhëllefe fir Kleng- a Mëttelbetriber. De Generalsekretär Romain Schmit kritiséiert awer d'professionell Orientatioun fir d'Schüler.
Nei Héichschoul fir Wirtschaft
Lëtzebuerg huet zënter der Rentrée en Institut Supérieur de l'Economie. Zwee Studiegäng a "Business Administration" ginn ugebueden. Eng Rei weider Offere sollen awer nach derbäi kommen.
