ANIL "Prime unique fir de Gesondheetssecteur kéint als Schweigegeld verstane ginn!"
Eng Petitioun fuerdert, eng Prime unique fir d'Personal aus dem Gesondheets- a Fleegesecteur. Dat fir hiren Asaz an der Corona-Kris. D'Associatioun vun den Infirmieren an Infirmièren - d 'ANIL - huet gemëschte Gefiller par Rapport zu där Iddi.
De ganzen Interview mat der Anne-Marie Hanff lauschteren
"Esou eng Primm ka just eng Drëps op e waarme Stee sinn", seet d'Anne Marie Hanff. D'Presidentin vun der Infirmiersassociatoun ANIL fäert, datt wann e puer honnert Euro ausbezuelt ginn, déi als eng Zort Schweigegeld kéinte gebraucht ginn. Dat nom Motto "Dir huet är Sue jo kritt, elo ass et gutt." E Méindeg soll déi parlamentaresch Petitiounskommissioun sech mat der Petitioun zum Theema befaassen.
"Den Engagement vun den Infirmiere muss sécher wäertgeschätzt ginn", esou d'Anne-Marie Hanff. Si sträicht awer och ervir, datt de Secteur wärend der Corona-Kris ganz einfach säin Job gemaach huet. Et wier een do fir de Leit ze hëllefen. A wann een am Gesondheetssecteur schafft, wéist een, datt een et och mat infektiéise Krankheeten, wéi engem Virus, ze doe kéint kréien.
Op de Secteur lauschteren
Méi wichteg wéi eng Primm fënnt d'Anne-Marie Hanff, datt dem Secteur nogelauschtert gëtt. Datt d'Fuerderungen erfëllt ginn: ënner anerem am Kontext vun der Formatioun.
Belaaschtend fir d'Personal am Alldag wier awer och den administrativen Opwand, deen zouhëlt. D'Fleegedokumentatioun wier net méi do, fir de Fleegeplang fir e Patient opzestellen, erkläert d'Anne-Marie Hanff. Dat wier aktuell méi e Finanzéierungsmëttel.
Op Basis vun der Dokumentatioun gëtt nämlech verrechent. "Dat ass eng Evolutioun, déi schwiereg ass", seet d'Anne Marie Hanff. Et géif virun allem dat dokumentéiert ginn, wat finanzéiert muss ginn. Mee net méi onbedéngt dat, wat wichteg ass.
Méi zum Thema
44 nei confirméiert Infektiounen
44 Leit goufen hei am Land bannent engem Dag positiv op de Coronavirus getest. Dat ass déi stäerksten deeglech Hausse zanter dem 21. Abrëll. Bannent de leschte 24 Stonnen goufen iwwer 4.217 Tester gemaach.
"Dat gehéiert an d'Ëffentlechkeet"
De Virolog Claude Muller fënnt et wichteg ëffentlech ze soen, sollt eng Party de Grond fir eng héich Zuel un neien Infektioune sinn. Dat géif nämlech weisen, datt esou Partyen net solle stattfannen.
EU wëllt Accès op Impfstoffer
D'Länner aus der Europäesch Unioun solle sech zesummendinn, fir sech Impfstoffer géint de Coronavirus ze verschafen, fënnt d'Europäesch Kommissioun. 4 EU-Länner hunn awer schonn een Accord mat engem Impfstoff-Produzent ofgeschloss.
