Däitschland Plagiat-Affär ëm d'Annalena Baerbock

Ugefaangen huet d'Opreegung an de soziale Medien, wéi sou dacks. "Plagiatsvirworf géint d'Buch vun der Annalena Baerbock" ass den dréchenen Titel vun engem Blog-Artikel, verëffentlecht vun engem éisträichesche Plagiats-Jeeër. Doran gëtt unhand vun enger Dosen Textstellen duergeluecht, datt déi gréng Kanzlerkandidatin an hirem Buch mam Titel "Jetzt. Wie wir unser Land erneuern" bei aneren Auteure soll ofgeschriwwen hunn.

Innerhalb vu kierzester Zäit huet sech den Artikel gedeelt. Honnerte Retweets bei Twitter, dausende Likes bei Facebook a Co. - D'Medien hunn ugefaangen driwwer ze schreiwen, och an der Tagesschau-Sendung, déi an der Hallschent vun engem Match vun der Futtball-Europameeschterschaft gelaf ass, war d'Nouvelle grouss derbäi.

Déi Gréng ginn an d'Offensiv

Zum Ierger vun den däitsche Gréngen an hirer Kanzlerkandidatin. Si si sech nämlech ganz sécher: d'Reprochë stëmmen net, et gouf net plagiéiert, bei der Form vum Buch - éischter e Manifest wéi e Sachbuch - wiere keng Foussnotten oder Änleches néideg gewiescht. Si hätt unhand vu Fakten d'Welt beschriwwe wéi se wier, sot d'Annalena Baerbock bei enger Podiumsdiskussioun vum Magasinn "Brigitte" dozou.

Trotz dëser Erklärung: d'Opreegung war grouss. Mee eben net just bei de Baerbock-Kritiker, och bei de Grénge selwer. Ongewinnt hefteg ass d'Partei an d'Offensiv gaangen. Huet vun enger Rufmord-Campagne géint hir Kandidatin geschwat, e prominente Medienaffekot ageschalt. An eben och ugefaangen, d'Medie selwer hefteg dofir ze kritiséieren, datt se d'Theema iwwerhaapt opgegraff hätten.

Zenter datt d'Reprochen an der Ëffentlechkeet sinn, gëtt an Däitschland doriwwer diskutéiert, wat dann elo iwwerhaapt Plagiat wier a wat net. Déi meescht Experte si sech eens: eng wierklech Verletzung vun den Auteursrechter géif net virleien. Souguer den éisträichesche Wëssenschaftler, deen d'Reprochë verëffentlecht huet, sot am Gespréich mam Spiegel, d'Textstellen, ëm déi et géif goen, wieren "näischt Weltbeweegendes". D'Buch misst senger Meenung no och net aus dem Handel geholl ginn.

D'Medien- a Politlandschaft ass ugespaant

Och déi Gréng hu mëttlerweil e Gang eropgeschalt. Eng Plainte wëllen se net maachen, de bekannten Affekot ass op eemol just nach Beroder. Mee d'Affär wéist, wéi ugespaant déi däitsch Medien- a Politlandschaft ass, wann et ëm déi Gréng geet. Datt den SPD-Kandidat Olaf Scholz an de Wirecard-Skandal verwéckelt ass oder den CDU-Mann Armin Laschet a sengem CV och Ännerunge virgeholl huet, suergt fir däitlech manner Opreegung.

Fakt ass: Am däitsche Bundestagswalkampf geet et bis elo wéineg ëm Inhalter. Déi Gréng soen zwar ëmmer, dat misst geschéien - mee hir Reaktioun op des rezentst Affär wéist, datt och si et net packen, d'Debatt an eng aner Richtung ze lenken.