Saint Paul Personalkris beim Wort
Beim Lëtzebuerger Wort rumouert et weider. D'Personalkris bei Saint Paul kéint nëmmen duerch en Direktiounswiessel an e Wiessel vun der Chefredaktioun gestoppt ginn seet de Guy Pelletier, President vun der Personaldelegatioun. Nieft de 70 Entloossungen hunn opmannst eng Dose Leit d'Lëtzebuerger Wort eisen Informatiounen no an de leschte Woche fräiwëlleg verlooss. Dovunner eng Majoritéit Journalisten.
D'Majoritéit vum Personal hätt kee Vertraue méi an d'Direktioun esou de Guy Pelletier, President vun der Personaldelegatioun bei Saint Paul.
"Well se einfach de Journalismus net am Blutt hunn, se hu keng Wäitsiicht, an den Input deen héchstwarscheinlech och positiv ass vum neie Proprietär, net d'Capacitéiten hunn fir dat ëmzesetzen."
Och den LCGB gesäit d'Zukunft vum Lëtzebuerger Wort éischter negativ. Et géife keng Perspektive ginn, seet d'Celine Conter. Si géif sech nach "déi eng oder aner Schwieregkeet" erwaarden. D'Céline Conter bemängelt och, datt ee keng Informatioune géif kréien, wéi et d'nächst Joer ekonomesch soll viru goen. "Et gi keng Perspektiven, datt et mam Betrib soll Bierg op goen."
Onkloer wier och wéi eng Profiller déi Leit sollen ersetzen déi demissionéiert hunn. De Freideg de Mëtteg um 14 Auer ass eisen Informatiounen no eng Reunioun tëscht dem Direkter Paul Peckels an de Journaliste geplangt. Ufank Januar ass et dann eng Reunioun tëschent der Delegatioun an der Direktioun. De Paul Peckels wollt op Nofro hin net op d'Aussoe vun der Delegatioun reagéieren.
Méi zum Thema
Exklusiv
Demissiounen an der Chefredaktioun
Mouvementéiert Zäiten an der gréisster Dageszeitung: Sechs Wochen nodeems eng 70 Mataarbechter beim Grupp Saint-Paul entlooss goufen, demissionéieren déi zwee Adjointë vun der Chefredaktioun.
Saint-Paul: 71 Leit Personal ginn entlooss
Beim Mediegroup Saint-Paul géifen 71 Leit entlooss, dat krute mer vum Paul Peckels, Generaldirekter vu Saint-Paul Lëtzebuerg confirméiert. D'Bréiwer un déi betraffe Mataarbechter géifen haut erausgoen.
LCGB geheit Saint-Paul Direktioun Mëssmanagement vir
Wéinst dem ugekënnegten neie Sozialplang beim Medie-Grupp Saint-Paul hat den LCGB de Moien e Protestpiquet virum Siège zu Gaasperech organiséiert. Et géif ëm d'Iwwerliewe vum Wort goen.
Sozialkonflikt bei Saint-Paul
Beim Grupp Saint-Paul gëtt et ee Sozialkonflikt. Well am Juli eng garantéiert Primm net ausbezuelt gouf, ass d'Gewerkschaft LCGB elo mat der Direktioun op der Schlichtung.
