Corona-Pandemie Paulette Lenert: "Eis Messagë sinn net iwwerall ukomm"

Déi éischt Prioritéit vun der Regierung wier elo verstäerkt ze sensibiliséieren. Fir datt dat geléngt, soll verstäerkt mat de Gemengen an de Betriber zesummegeschafft ginn. Et soll och méi op englesch an op portugisesch kommunizéiert ginn, esou d'Paulette Lenert.

Fir de Message besser eriwwer ze bréngen, wéilt een elo och mat de Betriber zesummeschaffen, seet d'Gesondheetsministerin.

"Eis Intentioun ass elo, datt mer esou breet wéi méiglech jiddwereen erreechen. Et ass einfach de Moment fir elo wierklech Alarm ze schloen. Mir hunn elo Mesurë geholl, déi net Mesurë vun engem Lockdown sinn. Dat ass eng grouss Ambitioun, well mer wierklech elo drop viséieren iwwer Sensibilisatioun ze fueren."

Et wier ee mat deenen Entreprisen a Kontakt, wou et méi Infektioune gi sinn. Do géif een dann och verstäerkt testen, esou d'Gesondheetsministerin. Eng "verstäerkt Presenz" wier et am Bausecteur ginn, mee dat wieren ëmmer just Momentopnamen, betount d'Paulette Lenert. Et misst een dat iwwer e puer Wochen evaluéieren.

D'Regierung wëllt awer net soen, a wéi engen Entreprisen dat wier, an et géif een och net d'Nimm vu Privatpersounen erausginn. "Dat ass eng Fro vun Dateschutz." D'Gesondheetsministerin wëllt och kee ganze Secteur "un de Pranger" stellen. "Dat wier net ubruecht."

Nei Restriktiounen sollen dës Woch nach gestëmmt ginn

Gëschter Owend hat d'Regierung an engem aussergewéinleche Regierungsrot nei Restriktioune festgeluecht. D'Gesondheetsministerin hofft, datt déi nei Reegelen nach dës Woch kënnen a Kraaft trieden. Et géif een alles maachen, fir datt den neie Gesetzestext Enn der Woch an der Chamber ka gestëmmt ginn, esou d'Paulette Lenert.

Vun deem Moment un dierft ee sech dann och doheem just nach mat zéng Leit treffen. D'Paulette Lenert betount awer, et géif sech ëm eng iewescht Grenz handelen, ee Rassemblement mat zéng Leit wier net onproblematesch:

"Mir mussen alleguer zesummen eis eege Responsabilitéit huelen, selwer nodenken: ass dat verstänneg? Geet dat wierklech?"

D'Paulette Lenert géif de Leit recommandéiere Rassemblementer mat anere Leit allgemeng "a Moossen ze halen". An och wann ee sech zu manner wéi zéng trëfft, wier et wichteg, Distanz zu eneen ze halen an d'Kontakter sou niddreg wéi méiglech ze halen.