Flächennotzungsplang PAG zu Esch am zweete Vott ugeholl
Den Escher Gemengerot huet den ëmstriddenen neie Flächennotzungsplang de Mëtteg am zweete Vott ugeholl, mat de Stëmme vun de Vertrieder vun der Majoritéit vun CSV, DP an deene Gréngen. Nom éischte Vott vum PAG viru bal zwee Joer waren d'Reegelen a Saache Colocatioune vu ville Säite kritiséiert ginn. D'Oppositioun am Escher Gemengerot huet haut géint de PAG gestëmmt an huet virum Vott op een neits Kriticke formuléiert.
Am neien Escher PAG géif e sozialpoliteschen Deel feelen, esou d'Conseillère a fréier Buergermeeschterin Vera Spautz (LSAP). Alternativ Wunnforme an der Unis-Stad an europäescher Kulturhaaptstad 2022 géife mam neie PAG onméiglech gemaach ginn.
"Si ginn onméiglech gemaach fir Studenten, si ginn onméiglech gemaach fir privat WGen, déi et scho ginn a wou Leit wëllen zesumme wunne goen, fir datt se net déi héich Präisser um Wunnengsmaart musse bezuelen."
Och fir Refugiéë géifen d'Dieren zougemaach ginn.
Sträitpunkt Colocatiounen
Och d'Vertrieder vun déi Lénk hunn déi nei Reegelen zu Esch kritiséiert a si hu virun de Konsequenzen dovu gewarnt. De PAG wier net dofir geduecht, d'Zesummeliewen ze reegelen, esou d'Conseillère Line Wies.
Eng oppe Stad dierft keng restriktiv Bautepolitik maachen, huet den onofhängege Conseiller Dan Codello gewarnt. D'Gemengen Diddeleng an Déifferdeng géife vun dëser restriktiver Politik profitéieren.
D'Vertrieder vun der Majoritéit am Escher Gemengerot hunn den neie PAG an d'Bestëmmunge fir Colocatioune verdeedegt. An de Buergermeeschter Georges Mischo (CSV) huet gesot, hien hätt a leschter Zäit 50 Colocatioune fir 250 Leit geneemegt.
Méi zum Thema
Nei Colocatiouns-Reegelen zu Esch "sinn illegal"
Am neie PAG vun der Stad Esch ass virgesinn, WGen an Eefamilljenhaiser méi streng ze reegelen. D'Vera Spautz ass der Meenung, datt dat net an e PAG gehéiert. Si kritiséiert d'Rhetorik vum Georges Mischo.
Co-Locatiounen: Esch verzicht vläicht op Reegelung am PAG
Den Escher Buergermeeschter Georges Mischo (CSV) ass eventuell bereet am neie PAG op eng Reegelung vun de Co-Locatiounen ze verzichten. D'Gemeng kéint dat och am Bautereglement reegelen.
