Monitoring vum LISER Pacte Logement 1.0: Ziler goufen net erreecht

Den éischte Pacte Logement war vun 2008 bis 2020 a Kraaft, 96 vun 102 Gemengen haten en ënnerschriwwen. Mee e groussen Deel vun deene Gemengen hunn hir Wuesstums-Ziler verfeelt. Dat geet aus dem Monitoring ervir, deen de LISER en Donneschdeg an der Logementskommissioun vun der Chamber presentéiert huet.

Sophie Schroeder / sam

Logement
Symbolbild. Foto: Puttachat Kumkrong / Bigstock

Lauschteren


D'Zil vum éischte Pacte Logement war et, an den demografesche Wuesstem vun de Gemengen ze investéieren an hir Awunnerzuel ëm op d'mannst 15 Prozent an zéng Joer eropzesetzen.

Als Konterpartie sollt de Staat en Deel vun de Käschte fir nei Wunnengen iwwerhuelen, déi d'Gemengen op hirem Territoire bauen. Vun de 96 Gemengen, déi d'Konventioun ënnerschriwwen hunn, hunn ee Fënneftel dovun dat Zil net erreecht.

Abordabel Wunnenge sinn net an ëffentlecher Hand bliwwen

Datt de Pacte Logement 1.0 als Echec kann ugesi ginn, läit dem Logementsminister Henri Kox no, dodrun, datt vill vun den abordabele Wunnengen net an ëffentlecher Hand bliwwe sinn, mee u privat Persounen verkaf gi sinn.

Dat hätt net dierfen esou sinn, seet de Logementsminister. Dofir wier d'Obligatioun haut, fir keng esou Wunnenge méi u privat Leit ze verkafen.

Beim zweeten, iwwerschaffte Pacte Logement sollen elo, anescht ewéi beim Éischten, d'Subventiounen un d'Schafe vun abordabele Wunnenge gebonne sinn. Fir dat ze garantéieren, gëtt den Ament zesumme mat de Gemengen un hire Stratégies Communales am Wunnengsbau geschafft, esou nach de Logementsminister Henri Kox.

Kritik vun déi gréng an déi Lénk

Aus dem Monitoring vum LISER geet ervir, datt vun den 478 Milliounen Euro, déi de Staat am Kader vum éischte Pacte Logement ausbezuelt huet, bal een Drëttel bis Enn vum leschte Joer nach net ausgi goufen. 37 Prozent vun den Investissementer sinn a Schoulen, 22 Prozent a Maison-relaisen a Crèchen, an 12 Prozent a Sport- a Kulturinfrastrukture gefloss.

Dat kritiséiert d'Semiray Ahmedova, d'Presidentin vun der Logementskommissioun an Deputéiert vun déi gréng. Si seet, datt d'Zil vu Logementer baue verfeelt gi wier, an datt et sech éischter ëm een "Infrastruktur-Pacte" géif handelen.

Der Vertriedung vun déi Lénk an der Logementskommissioun, Nathalie Oberweis, no, huet et u konkrete Planifikatiounsmesure gefeelt:

"Deemno ass de Wuesstem eigentlech kunterbunt an zimmlech wëll gewuess iwwerall ouni e klore Kader. An dat ass dat, wat mir bemängelen, virun allem wann een op eng ekologesch a respektvoll Aart a Weis denkt ze wuessen."

Méi zum Thema

Lëtzebuerg
Internationale Wärungsfong

Den Internationale Wärungsfong lueft de Pacte Logement 2.0 an de Baulandvertrag. Déi Mesurë ginn dem IWF awer net duer - si maache Lëtzebuerg konkret Proposen, zB keng Leit am Secteur public méi anzestellen.

Henri Kox
Logement

Am neie Pacte logement soll séchergestallt ginn, dat nëmmen déi Gemenge wuessen, wou et landesplaneresch Sënn mécht. Et wier wichteg, méi abordabele Wunnraum ze schafen, seet den Henri Kox.

Net verpassen

Dossieren

  • Chamberwalen 2023

    Am November gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen