Santéskommissioun Optimismus mat vill Virsiicht
D'Deputéiert aus der Santéskommissioun bleiwe queesch duerch d'Fraktioune virsiichteg, wat eventuell nei Mesurë géint d'Covid-Pandemie ugeet. Zwar war eng vun de Conclusioun no der Reunioun de Moien, datt d'Zuelen aktuell gutt géifen ausgesinn, et wier awer nach ze fréi fir konkret ze ginn. D'Regierung soll iwwer de Weekend de Point maachen, gouf de Moien annoncéiert.
Den iwwernächste Sonndeg leeft dat aktuellt Covid-Gesetz aus - d'Chamber wäert also d'nächst Woch iwwer een neit Gesetz mussen ofstëmmen. Ee virleefegen Zäitplang steet, de Mars Di Bartolomeo, President vun der Santéskommissioun, geet dovun aus, datt d'Regierung iwwer de Weekend wäert Conclusiounen huelen an decidéieren, ob weider ka gelackert ginn oder net.
Ze fréi, fir Mesuren ze antizipéieren
Et gëtt eng Grëtz Optimismus, deen awer net definitiv ass, de Mars Di Bartolomeo. "D'Zuelen hu sech gutt entwéckelt, ouni datt een elo scho Victoire soll jäizen."
Och bei de Gréngen ass d'Josée Lorsché éischter virsiichteg, stellt awer och fest, datt d'Mesuren Enn des Joers gewierkt hätten. Fir elo schonn ze antizipéieren, wat fir Decisiounen de Weekend musse geholl ginn, wier awer definitiv ze fréi, sou d'Josée Lorsché.
Oppositioun gesäit eng positiv Entwécklung
Och op Säite vun der Oppositioun gesäit een eng positiv Entwécklung a Richtung vu enger Stabiliséierung vun den Zuelen op méi nidderegem Niveau. Dat géif awer net duergoen, seet de Sven Clement vun der Piratepartei, et dierft ee sech net mat 127 Neiinfektiounen op 100.000 Awunner zefridde ginn.
Och bei der CSV gesäit een och hei eng positiv Entwécklung, Lëtzebuerg hätt ee Wee gemaach bannent engem Mount, seet de Claude Wiseler, mee d'Lag wier volatil. Et hätt een d'Situatioun vun den Nopeschlänner an an aneren europäesche Länner am Bléck. Et kéint een nach net genee soen, wat een an zwou Woche misst maachen.
Sollt d'Regierung sech iwwer de Weekend op nei Oplockerungen eens gi well d'Zuelen sech gutt entwéckelen, da misste Caféen a Restauranten erëm opmaachen, fuerdert de Jeff Engelen vun der ADR.
Méi zum Thema
Covid-Gesetz gouf gestëmmt
D'Ännerungen um Covid-Gesetz goufen an der Chamber ugeholl, dat mat den 31 Stëmme vun der Majoritéit. D'Oppositiounsparteien hunn dogéint gestëmmt. Déi nei Mesuren trieden deemno nächste Méindeg a Kraaft.
Neit Covid-Gesetz: Oppositioun kritiséiert Regierungsapproche
E Méindeg soll dat neit Covid-Gesetz a Kraaft trieden. De Rapporter vum Gesetzesprojet verteidegt d'Demarche vun der Regierung, et kéint awer sinn, datt een a puer Wochen nees misst "zouzéien". D'Oppositioun kritiséiert déi Approche.
D'Gesondheetsministerin reagéiert op Kritik vum saarländesche Ministerpresident
D'Gesondheetsministerin Paulette Lenert gesäit d'Kritik vum saarlännesche Ministerpresident als eng "réaction à chaud". Si géif sech froen, ob den Detail vun de geplangte Mesurë scho bekannt wier, esou d'Ministerin.
Xavier Bettel: D'Politik muss e Kompromëss fannen
De Premier Xavier Bettel verdeedegt d'Decisioun vun der Regierung, fir eenzel Restriktiounen ze lackeren. Et misst een awer och séier reagéiere kënnen, wa beispillsweis an dräi Wochen d'Zuelen erëm an d'Luucht géife goen.
