Wunngemeinschaften Nei Colocatiouns-Reegelen zu Esch "sinn illegal"
Am neie PAG vun der Stad Esch ass virgesinn, WGen an Eefamilljenhaiser méi streng ze reegelen. D'Vera Spautz ass der Meenung, datt dat net an e PAG gehéiert. Si geet dovunner aus, datt Juristen de Buergermeeschter dorop opmierksam gemaach hunn.
Am neien allgemenge Bebauungsplang vun der Gemeng Esch ass virgesinn, Wunngemeinschaften an Eefamilljenhaiser streng ze limitéieren. D'LSAP-Gemengeconseillère Vera Spautz ass der Meenung, datt esou eng Reegel net géif an e PAG gehéieren. Si geet dovunner aus, datt Juristen den CSV-Buergermeeschter Georges Mischo am Virfeld dorop opmierksam gemaach hätten.
Kritik un der Rhetorik
D'Vera Spautz kritiséiert och d'Rhetorik vum Georges Mischo: et géif ganz bewosst Konfusioun gemaach ginn an alles an een Dëppe geheit ginn.
"An déi Impressioun verstäerkt sech nach méi, wann esou Aussoe komme wéi - an dat ass eng ganz fuerchtbar Rhetorik, déi do gebraucht gëtt - "mir wëlle Wunngemeinschaften net verbidden, mee reguléieren", "mir wëllen, datt Communauté domestiquen do dra kommen". Déi Aussoen, déi waren erschreckend."
Eng Communauté domestique ass am Reglement definéiert als Familljen als Leit, déi e "Lien affectif" hunn. D'Vera Spautz kritiséiert och hei d'Wiel vun de Wieder vum Georges Mischo, hien hat vu Leit, "déi matenee ginn", geschwat. "Wat ass dat fir eng Rhetorik?", freet sech d'Vera Spautz.
"Mee awer och déi Rhetorik ze soen, wa mer et net esou streng reguléieren, dann ass zu Esch d'Anarchie. D'Anarchie. Wat ass dat fir eng Aart a Weis déi ënnerschiddlech Wunnformen, déi sech mëttlerweil ëmmer méi entwéckelen - wat och gutt a richteg ass - fir déi Leit esou ze tituléieren, déi an enger WG wëllen zesummewunnen."
Ier datt den neie Bebauungsplang a Kraaft trëtt, muss de Gemengerot en an engem zweete Vott guttheeschen. De Buergermeeschter Georges Mischo huet sech scho bereet erkläert virun deem Vott nach Upassungen um Plang ze maachen.
An der Mediathéik:
LauschterenMéi zum Thema
Keen Argument géint Wunngemeinschaften an Ee-Familljen-Haiser
U sech gëtt et keen Argument géint Wunngemeinschaften an Ee-Familljen-Haiser, seet de Logements-Minister. Et wier kloer, datt de Loyer an der Zomm bei e puer Locatairen net méi héich dierft sinn, wéi wann d'Haus als e Ganzt géif verlount ginn.
Co-Locatiounen: Esch verzicht vläicht op Reegelung am PAG
Den Escher Buergermeeschter Georges Mischo (CSV) ass eventuell bereet am neie PAG op eng Reegelung vun de Co-Locatiounen ze verzichten. D'Gemeng kéint dat och am Bautereglement reegelen.
