Reaktioun op Bundestagswahlen "Nees Nazien am Reichstag"
70 Joer nom Enn vum Krich géifen nees rietsextrem Gedanken an Däitschland propagéiert ginn, seet de Jean Asselborn. All déi demokratesch Parteie misste sech elo géint d'AfD wieren.
Et wieren nees Neonazien am Däitsche Bundestag vertrueden, zitéiert d'DPA den Ausseminister Jean Asselborn. "Dat ass eng staark Reaktioun, mä dat ass d'Realitéit", seet de Jean Asselborn um radio 100,7. Et wier e Fait, datt 70 Joer nom Zweete Weltkrich nees Nazien am Reichstag wieren. D'AfD wier net eng Partei wéi déi aner.
"Et ass a mengen Aen d'Aufgab vun allen demokratesche Parteien an Däitschland, ob si an der Regierung sinn oder an der Oppositioun, datt dat do net Mainstream gëtt. Datt sech do dogéint gewiert gëtt."
An Zäite vu Krich a Syrien an Irak, Instabilitéit am Osten, Flüchtlingen an Terrorismus hätt d'Spill mat der Angscht vun der AfD Friichte gedroen. Et wier extrem schwiereg fir als Partei géint deen Trend dogéint ze halen, wann een an der Regierung wier. Et géif net duergoen, elo just deenen anere Parteien d'Schold ze ginn.
D'Decisioun vun der SPD fir an d'Oppositioun ze goe wier richteg, seet de Jean Asselborn. "Et däerf net sinn, datt d'AfD déi éischt Oppositiounspartei am Bundestag ass." D'Sozialiste missten een neien Ulaf huelen.
Méi zum Thema
"Ganz Berlin hasst die AfD!"
D'Bundestagswahl huet mat der AfD ee grousse Gewënner. Zu Berlin sinn awer honnerte Leit géint déi rietsextrem Partei op d'Strooss gaangen. D'SPD frënnt sech iwwerdeems mat der Oppositiounsroll un.
Merkel an CDU/CSU stäerkste Kraaft an Däitschland
CDU an CSU kommen éischten Héichrechnungen no op 32,5 Prozent. Mat 13,5 Prozent zitt d'AfD an d'Parlament an a gëtt drëttstäerkste Kraaft hannert der SPD, déi op 20 Prozent kënnt.
