Coronavirus "Mir steieren direkt op eng Pandemie zou"

Et misst ee sech bewosst sinn, "datt mer riicht op eng Pandemie lassginn", seet d'Gesondheetsministerin Paulette Lenert. D'Autoritéiten hätten d'Situatioun awer am Grëff, esou wäit dat an deem Zenario ebe méiglech wier.

Maurice Molitor (Interview) / Claude Biver (Web)

Paulette Lenert
De Maurice Molitor am Gespréich mat der Paulette Lenert

Et wier ee beschtens preparéiert op eng nächst Phas vun der Kris, seet d'Paulette Lenert. Besonnesch d'Spideeler wiere prett an och ekipéiert, fir Patiente mam neiaartege Coronavirus opzehuelen. An der nächster Phas, déi elo komme géif, misst ee sech drop gefaasst maachen, datt méi Leit hei am Land wäerte Komplikatiounen hunn.

"Do hu mer genuch Better. Mir hunn d'Chance, datt mer an der Moyenne méi Better pro Kapp hu wéi aner Länner. Dat ass ni eng absolut Garantie, mee mir sinn hei am Land relativ gutt opgestallt. Mir hunn och generell e gudde Gesondheetssystem. Dat kënnt engem an esou enger Situatioun zegutt."

D'Gesondheetsministesch Paulette Lenert rifft weider dozou op, net a Panik ze verfalen, dat géif an der aktueller Situatioun näischt hëllefen.

Privat Laboe sollen och kënnen Tester op de Virus maachen, dat géif awer net bedeiten, datt de Staatslabo un de Grenze vu senge Capacitéiten ukomm wier, seet d'Ministerin. Et géif och näischt um Prinzip änneren, datt just Leit getest ginn, déi déi duebel Konditioun erfëllen: aus enger Risikoregioun ze kommen a Symptomer ze hunn. Et wéilt een domat verhënneren, "datt mer iwwerlaf ginn", seet d'Paulette Lenert.

"Et kann een eng Pandemie net zu 100 Prozent kontrolléieren"

Wéi den éischte Fall vum neiaartege Coronavirus zu Lëtzebuerg festgestallt gouf, huet d'Ministerin gesot, datt een alles am Grëff huet. Mëttlerweil hätt een net méi dee selwechten Optimismus, "well d'Kris eng Kéier geholl huet an de leschte Wochen an Deeg, déi awer net jiddwereen esou virausgesinn huet", seet d'Paulette Lenert.

"An et muss een och wëssen: Mir gi wierklech riicht op eng Pandemie lass. Wann een d'Weltgesondheetsorganisatioun elo héieren huet, sti mer kuerz virdrun. An eng Pandemie definéiert sech doriwwer, datt ee se net zu 100 Prozent ka kontrolléieren."

Et kéint een an esou enger Situatioun net alles ënner Kontroll hunn, mee et kéint een awer preparéiert sinn. "An dat ass dat, wat mer ustriewen."

D'Ausbreede vum Virus wier net déi op déi liicht Schëller ze huelen, seet d'Paulette Lenert. "A si wäert och hire Präis hunn. Ech mengen, et ass evident, datt dat wäert Spueren hannerloossen." Et wier eng Illusioun ze mengen, datt Lëtzebuerg ofgekapselt wier. D'Gesondheetsministerin wëllt net ausschléissen, datt och eng Kéier eng Persoun zu Lëtzebuerg um Virus kéint stierwen.

An der Mediathéik:

Invité vum Dag / / Maurice Molitor
Lauschteren

Méi zum Thema

Restaurant
Coronavirus

Wéinst dem neiaartege Coronavirus rechent d'Horesca mat iwwer 40 Prozent manner Ëmsaz fir de Secteur vun Hoteller, Restauranten a Caféen hei am Land. D'Annulatioune géife bei bis zu 60 Prozent leien.

Luc Frieden
Coronavirus

Duerch den neie Coronavirus wäert de Wirtschaftswuesstum hei am Land dëst Joer däitlech zeréckgoen, seet de Luc Frieden. Hie rechent mat engem Réckgang vun op d'mannst engem Prozent vum PIB.

De Präis fir de Pëtrol geet erof
Coronavirus

Um Pëtrolsmarché sinn d'Präisser haut ganz staark gefall: rieds geet vun engem Pëtrolspräis-Crash. Beim Pëtrol aus dem Nordmier a beim US-Pëtrol sinn d'Präisser ëm all Kéier ronn 30 Prozent zeréckgaangen.

Friedrich Mühlschlegel
Coronavirus

Den LNS zu Diddeleng huet zanter Enn Januar schonn 122 Tester op den neie Coronavirus duerchgeféiert, seet den LNS-Direkter. Den Testprozess géif elo virun automatiséiert an d'Testcapacitéite géife weider erhéicht ginn.

Programm

Praktesch Infoen

  • 3.6. Generatiounen

    3.6. Generatiounen

    Manner Kalorien, Orchester an Danzmusek mam René de Bernardi an "The Sound of Music"

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen